Tơdroăng trâm mâ tơpui tơno ƀă mâu ngế ki kơhnâ rơkê hôm păng ‘nâng tung tâi tâng khu lêng ‘na hriâm tâp ƀă pêi tiô troăng tơdjâ Pôa Hồ Chí Minh; khŏm mơ-eăm hbrâ mơdât chuh ngiah krê tung rơxông nếo.

Mâu tơdroăng hơ’muăn khât păng ‘nâng ‘na hiâm mơno pleăng hnoăng cheăng, hâk vâ tơmiât pêi rơkê xua kuăn pơlê, xua hnoăng cheăng gâk kring Tơnêi têa, xua hnoăng cheăng lâp plâi tơnêi kơnâ dêi dêi mâu lêng hiăng châ vêh pro ing mâu tơdroăng ki chêh ‘na tơdroăng pơlê pơla, mâu tơdroăng rơhdruê xuăng ƀă mâu tơdroăng tơpui tơno tơdrêng a tơdroăng kum kuăn pơlê hlê plĕng tâ ‘na hiâm mơno Mô đô̆i Pôa Hồ; ing mê troh lâp lu mâu troăng pêi ki nếo, troăng pêi rơkê, tơmiât pêi rơkê, châ tơƀrê tung tâi tâng kuăn pơlê.

Môi tung kơxô̆ hrĭng ngế ki kơhnâ rơkê mê cho Thươ̆ng ŭy Nguyễn Tuấn Anh, Kŏng ti gâk kring măng, Viettel, ngế hiăng hâk vâ hriăn plĕng, ti tăng plĕng hiăng tối tơbleăng lâp plâi tơnêi lối 600 tíu tơ’nhiê ‘na pơkí, gum mâu khu tơrŭm cheăng, grup pơkuâ kŏng ti kân, ví mâu tơdroăng tro lŭp hên ‘na liăn ngân ki loi tơngah. Thươ̆ng ŭy Nguyễn Tuấn Anh tối:

“Tơdroăng cheăng ki xiâm dêi á cho veăng tung khu redteam ai hnoăng cheăng môi tiah hacker vâ ti tăng mâu tíu ki tơ’nhê pơkí tơdjâk ‘mêi ing pakong ƀă tung kơmăi kơmok dêi mâu kŏng ti, khu tơrŭm cheăng, ƀă ing mê ti tăng troăng vâ rơnêu tíu tơ’nhê. Á ƀă mâu khu pú pakĭng tơdroăng hâk vâ ƀă tơdroăng cheăng xuân thế đi đo mơ-eăm ôh tá tot tơkâ hluâ tŭm tơdroăng pơkâ vâ chiâng pơkuâ kŏng ngê̆, kum gâk kring kuăn pơlê, Tơnêi têa tung măng’’.

Tơdroăng ối ai tơdroăng ki veăng dêi kuăn pơlê cho kuăn pơlê hdroâng kuăn ngo, tŭm 5 ngế tro kâ kơxêt ‘mêi dế trâm tơdroăng ki ôh tá tơniăn châ chăn, tơdrêng amê troăng troh hngêi pơkeăng lối hơhngế. Drêng ai tơdroăng mê mâu lêng ƀok thái pơkeăng hiăng ƀă tâi tâng troăng, pêi tâi ivá tŏng rêh tâi tâng mơngế tung rơpŏng. Kuăn pơlê ki mê hiăng djâ tâi tâng hiâm mơno ƀă hiâm mơno pâ mơnê troh tơpui tối a tíu po pêi cheăng:

“Á mơnê kơ ƀok thái pơkeăng hên ‘nâng, kơnôm ai meh mê tâi tâng rơpŏng á o hlŭn ing hlâ, troh nôkố ivá châ mo sêi. Troh ƀă tơdroăng hâi kố rơpŏng á o ai kơxuô tơmeăm vâ pơtroh diâp ăm meh. Á o ƀă rơpŏng diâp meh ƀă vâ tơpui tối cho rơpŏng á o ing kố kô kơnó ‘nâi kơxêt ki ‘mêi, ki lâi kơxêt lĕm chiâng kâ’’.

Ƀă chôu po 90 phut, tơdroăng tơpui tơno a um tơvi mơ’no tơdrêng trâm mâ tơpui tơno mâu ngế ki kơhnâ rơkê “Bâ eăng hiâm mơno lĕm Mô đô̆i Pôa Hồ” cho tơdroăng tơdjêp ing tơdroăng ki ai khât dêi ngế ki troh trâm mâ tơpui tơno, tung mê, ai mâu tơdroăng roh apoăng châ tối tơbleăng, rơtế mâu tơdroăng chêh tơdroăng ai khât tơmeăm ki vâ pro tơmeăm ƀă hên tơdroăng ki nếo, pro mơngế tơmâng ngăn hâk vâ, pro rơrêk tung hiâm mơno mơngế ki ngăn, hlối mơđah tơbleăng rơhdruê xuăng  châ pro dâi lĕm, má môi, hlối ai ngế tơpui djâ; ing mê kum mâu ngế ki ngăn hlê plĕng nhên tâ ‘na hiâm mơno Mô đô̆i Pôa Hồ; kum troh lâp luô troăng pêi nếo, troăng pêi rơkê, châ tơƀrê tung tâi tâng khu lêng.

Pôa Nguyễn Trọng Nghĩa, Kăn cheăng tung Khu xiâm kal kí, Kăn xiâm pơtâng tối tơdroăng kal Tơnêi têa tối ăm ‘nâi, sap hơnăm 2021, Khu pơkuâ cheăng Đảng Tơnêi têa kơvâ cheăng lêng hiăng tơbleăng pơkâ ‘na mơnhông hiâm mơno “Mô đô̆i Pôa Hồ”, khŏm tơtrâ chuh ngiah krê tung rơxông nếo. Ing mê pơkâ mê, troh nôkố khu lêng dêi pin xông kân rơdêi tâi tâng, tá tơdroăng hnê pơtâp, tơdroăng hbrâ rơnáu tơplâ, pêi cheăng pêt mơjiâng tơmeăm. Kơvâ cheăng dêi khu lêng pêi cheăng ƀă ki rơhêng vâ tối cho hiâm mơno Pôa Hồ rế hía rế châ pơloăng mơnúa, rế hía rế troh lâp lu tung tâi tâng mâu kơvâ cheăng tá tung tơdroăng gâk kring hnoăng pơkuâ, xuân môi tiah hbrâ ví kong prâi pro ôh tá tơniăn, hbrâ mơdât pơreăng.

Ƀă khu lêng hbrâ pleăng châ chăn vâ gâk kring hơniâp lĕm, ivá ăm kuăn pơlê. Kô chiâng vâ mơnhên, Pơkâ dêi Khu râ kăn pơkuâ hnê ngăn cheăng Đảng tơnêi têa kơvâ cheăng lêng “ ‘na mơnhông hiâm mơno lĕm “Mô đô̆i Pôa Hồ”, khŏm tơtrâ chuh ngiah krê tung rơxông nếo’’ cho Pơkâ ki kal, kal khât, kum mơjiâng Khu lêng krá tơniăn ó rơdêi ‘na kal kí, mơdêk ki dâi lĕm tâi tâng, ivá tơplâ, kêi đeăng tâi tâng rêm hnoăng cheăng châ pơcháu’’.