Ngế xiâm ngăn troăng prôk rơxế kơtâu Nguyễn Văn Thắng pơchuât ‘nâng ‘nâi hlá mơ-éa pơtroh ăm Chin phuh ‘na troăng ‘no liăn pro tơdroăng tơkêa troăng rơxế lơ treng Bắc – Nam. Tiah mê, troăng rơxế lơ treng pơxiâm a Pơlê kong kân Hà Nội ƀă mơgêi a Pơlê kong kân Hồ Chí Minh tơkâ luâ 20 to kong pơlê, pơlê kong kân; ki xŏn lối 1.540 km; tâi tâng liăn pro lối 1 rơtuh 700 rơpâu rơtal liăn (dâng 67 rơtal dollar). Tiô tối kô pơxiâm pro a hơnăm 2027; mơ-eăm pro tâi tâng troăng a hơnăm 2035. Ăm rơkong tơpui ‘na tơdroăng kố, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, Khu xiâm pơkuâ tơdroăng kal kí, Khu pơkuâ ngăn Đảng kal vâ ‘nâi plĕng khât troh tơdroăng tơkêa pro troăng rơxế lơ treng Bắc Nam:

“Tâng châ pro troăng rơxế lơ treng xŏn tơdrăng Bắc – Nam kố ƀă kơxô̆ liăn ‘no tâi cho 67 rơtal dollars, tơnêi têa pin kô ai rôh vâ mơnhông. Ôh ti xê pro nôkố tơdrêng hlối mê kô klêi tung pơla hơnăm 2025, hơnăm 2035. Tâng pro ‘nâng ‘nâi rĕng tâ nếo gá rế ‘ló. Nôkố kong têa ê ai tơdroăng tơkêa kân tâk to lâi hdroh tơdroăng tơkêa kố ki vâi tơbleăng pro tung pơla tá hâi châ 3 hơnăm. Ƀă pin mê á tơmiât tiah kố, pơhlêh liăn ngân xuân cho ăm tơná pin, pro mơ-eá liăn ngân xuân tơná pin pơkâ. Tiah mê pro ti lâi vâ tŏng gum xơpá, tơvâ tơvân”.

Klêi kơ’nâi hmâng pơchuât tơbleăng séa ngăn xuân môi tiah pơpchuât tơbleăng tơpui tối leăng dêi Chin phuh, mơgêi tơdroăng kố, pôa Nguyễn Đức Hải, Kăn xiâm phŏ hnê ngăn Kuô̆k hô̆i ăm ‘nâi, Vi ƀan pơkuâ Kuô̆k hô̆i séa ngăn pơkâ troăng hơlâ ‘no liăn pro troăng rơxế lơ treng xŏn tơdrăng ing troăng xiâm Bắc – Nam a hneăng hôp má 8, Kuô̆k hô̆i hneăng 15. Kố cho tơdroăng tơkêa ai túa pơkâ tá ai a tơnêi têa pin. Xua mê, Vi ƀan pơkuâ Kuô̆k hô̆i pơkâ thế, Chin phuh pơtối séa ngăn vâ riân ngăn tâi tâng kơlo ‘no liăn pro ƀă túa kơchuâ chêh rak tơniăn kơdĭng tơƀrê, ‘mot tơ’nôm tơdroăng tơpui tối leăng tung mâu túa pơkâ pơchông ngăn vâ pêi pro nhên tơdroăng ki châ rah xo troăng prôk dêi tơdroăng tơkêa kố.

Drêng tơbleăng tơdroăng tơkêa troăng rơxế lơ treng troăng xiâm Bắc – Nam, kal mơnhên tối tơ’nôm ‘na ƀăng tơnêi pêt báu, ƀăng tơnêi pêt kong athế pơhlêh ƀă mâu troăng hơlâ vâ rak tơniăn mâu pơkâ ‘na tơnêi pêt báu, kơxô̆ ki pro xâp dêi kong, râ kăn pơkuâ hiăng pơkâ; mơnhên tối tơdjâk dêi tơdroăng tơkêa troh tơdroăng ki hriăn ngăn tơ’nôm ‘na xing xoăng kơxô̆ ki hên iâ, mơnhên tối kih thuât tơdjâk kân troh pro tơdroăng tơkêa vâ ai troăng mơ-eăm troh hơnăm 2035 kô klêi tâi tâng; pơchân tơdroăng ki xo tơvêh tơnêi chêl thiê̆n tơnêi, tŏng gum, vêh pro pơlê; tơdroăng ki rah xo khu ki ‘no liăn, tơdroăng ki xúa kong ngê̆ mâu ngế cheăng, pêi xơmong, tơdroăng xúa on tơhrik tung pơla mơjiâng pro ƀă tơbleăng pro tơdroăng tơkêa.

‘Na kơxô̆ liăn pro tơdroăng tơkêa kố tâi tâng liăn ‘no ăm tơdroăng tơkêa kố gá hên, tá kơxô̆ liăn mơjiâng pro la kơxô̆ liăn pơxiâm pro. Xua mê, vâ rak tơniăn tơƀrê, rak tơniăn bê tŭm liăn tơnêi têa kal mơnhên tối nhên, pơkâ tung tơdroăng tơnêi têa dế tơbleăng pro hên tơdroăng tơkêa hngêi trăng troăng klông ki kal, ki kal pro tơdrêng tung kơvâ troăng prôk, on tơhrik vâ ai troăng hơlâ hbrâ mơdât ki ôh tá mơhúa, malối cho ví mâu tơdroăng ôh tá mơhúa xua ôh tá pro klêi ăm xúa xua ôh ôh tá bê liăn, ôh tá mơhúa ôh tá tơdâng tơ’mô liăn ngân tung ‘no tung pơla krâ kơvâ hơnăm drêng mâu kơxô̆ liăn chĕn hiăng troh hơnăm mơdrếo ƀă hiăng mơdrếo hên; ôh tá mơhúa kân tung tơdroăng chĕn mung liăn kong têa ê, tơdjâk troh ki hbrâ rơnáu ‘na liăn ngân dêi tơnêi têa.

Vi ƀan pơkuâ môi tuăn kal ai mâu troăng hơlâ pêi pro ki tơƀrê vâ pro tơdroăng tơkêa kố. Laga, vâ rak tơniăn khât, pâ thế Chin phuh vêh séa ngăn 19 troăng hơlâ ki tơpui tối leăng nhên tâ, mơnhên tối ki tơdjâk, bu ăm xúa tung Pơkâ mâu troăng hơlâ ki kal khât tơdjâk troh ki tơƀrê, iâ rak tơniăn troăng hơlâ xing xoăng, tơrŭm séa ngăn hnoăng pơkuâ pơla mâu kơ koan, tíu pêi cheăng, troăng hơlâ séa ngăn, pôi tá ăm ai tơdroăng ki pro hía, mơ’nhê liăn ngân, pơchân troh mâu troăng hơlâ, kơ koan séa ngăn, pơkâ thế pôi tá chiâng pơkâ rơnêu lơ mơnhên tối nhên ki tơdjâk drêng pơkâ.