Hngêi vâi pú “tơnêi rơdâ 100 m2 hiăng châ diâp ăm rơpŏng hngêi Đại ŭy Y Thuy Ƀkrông, Ƀơrô tí tăng ngăn mâu tơdroăng dêi Khu xiâm pơkuâ ngăn lêng tơkăng kong Dak Lak. Hngêi lĕm, dêi mâu vâi pú pro veăng gum ăm 6 ngế tung rơpŏng hngêi lêng Y Thuy Ƀkrông hmiân tuăn rêh ối, pêi cheăng, mơ-eăm mơnhông tơná tung rêh ối; hlối pro xiâm tuăn loi ăm mâu kăn ƀô̆, mâu lêng hmiân tuăn rơtế ƀă tíu pêi cheăng, hbrâ vâ xo ƀă pêi klêi mâu tơdroăng cheăng châ pơcháu.

Tiô Đăi tă Đào Viết Hùng - Ngế pơkuâ  Khu xiâm pơkuâ ngăn lêng tơkăng kong dêi kong pơlê Dak Lak, tung hơnăm 2024, mâu kơ koan, tíu pêi cheăng, khu mơdró hiăng rơtế veăng kơjo kum pro 11 “toăng hngêi tuăn pâ” ƀă “Hngêi tơtô tíu tơkăng kong” kơjo kum kuăn pơlê a kơpong tơtăng kong ƀă mâu lêng kơtiê xơpá ‘na hngêi ối. Tung mê, krê VOV Tây Nguyên hiăng pro 2 toăng hngêi kơnâ 150 rơtuh liăn.