Veăng lăm tăng chiâ rôu, djâ tơvêh kơxêng kiâ mâu mố đô̆i ki hlâ rôh kố, mâu kăn ƀô̆ mâu lêng dêi Đội K 52, Ƀơrô kăl kí, Khu xiâm pơkuâ ngăn lêng  kong pơlê Gia Lai pơtối klâ mâu tôh, khu tơkŭm lăm tăng a pái kong pơlê Peăng mâ hâi lo ‘na kơnhŏng kong têa Kul, mê cho:  Preah Vihear, Stung Treng ƀă Ratanakiri.

Sap nôkố ta troh tâi rơnó mơdrăng tơdế hơnăm 2025, a rôh leh ăm lêng lăm tăng, mâu kăn kong pơlê Gia Lai rơtế ƀă mâu khu xiâm pơkuâ ngăn Lêng kong pơlê Gia Lai hiăng pơtroh rơkong kơ-êng, mơhnhôk mâu lêng lăm pêi hnoăng cheăng rôh kố. Pakĭng mê, pơkâ thế đô̆i K52 pơtối ‘nâi nhên mâu pơkâ ‘na tơrŭm cheăng lâp plâi tơnêi, rak vế pêi pro tro luât lêng, mâu pơkâ dêi Khu xiâm pơkuâ ngăn lêng, dêi Kuân khu tung tơdroăng tơrŭm tơpui kâ. ‘Nâi nhên tíu lăm tăng, mâu tơdroăng ‘na tơnâp ‘mế mâu ki hlâ, rak tơniăn mâu tơdroăng xuân châ séa ngăn, tăng ngăn vâ mơnhên.