Cho môi tung mâu rơpŏng ai tơdroăng rêh ối pá puât châ tơdah xo hngêi tuăn mơno hơ-ui xua Khu kăn Kuô̆k hô̆i kong pơlê Dak Lak tơrŭm ƀă Hngêi rak liăn Quân đội diâp ăm, pôa Y Nguyên Niê a ƀuôn Jung B, cheăm Ea Ktur, tơring Čư̆ Kuiñ ƀriê tung hiâm mơno. Pôa ối môi ngế, kơdrâi pôa tro tamo châi hiăng hlâ kơtăn kố 2 hơnăm. Kuăn ‘nĕng pêi cheăng hngế, lôi pôa ối môi ngế ƀă 2 ngế cháu tơxĭn. Mâu liăn ngân ‘no hrê dêi rơpŏng cho tơkôm to a kơdrum kơphế ki hiăng krâ rơtế ƀă tơdroăng cheăng pêi hơ’lâk prêi xơmong ăm khu ki pro hngêi ôh tá tơniăn.

Toăng hngêi tâl ki hiăng tơ’nhiê, xi kơchoh hiăng to lâi chât hơnăm kố xuân ôh tá chiâng vâ ‘mêng rơnêu xếo. Mê drêng châ gum 80 rơtuh liăn vâ pro hngêi nếo, pôa ro ôh tá chiâng koi. Châ hlo rêm hâi hngêi pro rế vâ klêi, tơdroăng ro tung pôa rế hên tâ. Pôa Y Nguyên Niê tối:

“Hdrối nah hngêi hiăng tơ’nhiê tâi, nôkố tơnêi têa gum ăm á liăn á pro hngêi ki kố. Á mơnê Đảng, Tơnêi têa hiăng tŏng gum”.

Châ diâp hngêi tuăn mơno hơ-ui rơtế ƀă rôh pôa Y Nguyên Niê a mơ’nui khế 9 kố nah, jâ H’Sang Pang Ting a ƀuôn Buốc, cheăm Nam Ka, tơring Lăk, kong pơlê Dak Lak xuân phiu ro khât. Rơpŏng jâ cho rơpŏng kơtiê, tơnêi pêi kâ iâ, ôh tá ai tơdroăng cheăng pêi tơniăn, ki hên cho lăm pêi cheăng vâi. Tung rơpŏng ai 8 ngế tung pơla pêi lo liăn ôh tá tơniăn, mê jâ xuân ôh tá khên tơmiât troh tơdroăng ki rơnêu hngêi tal ki hiăng tơ’nhiê hên hơnăm. Drêng châ pơcháu ăm toăng hngêi nếo, jâ H’Sang ƀriê:

“Tơdroăng rêh ối rơpŏng hngêi á hdrối nah gá xơpá khât, hngêi cho hngêi ối pơtân tê. Nôkố châ khu râ tơmâng ngăn tŏng gum ăm rơpŏng á ai toăng hngêi ki lĕm krá môi tiah kố tơná á ƀă rơpŏng hngêi xuân tơhrâ kô mơ-eăm pêi cheăng kâ vâ mơnhông rơpŏng hngêi hluăn ing kơtiê”.

Jâ Lê Thị Thanh Xuân, kăn phŏ pơkuâ Khu kăn Kuô̆k hô̆i kong pơlê Dak Lak ăm ‘nâi: Pakĭng mâu tơdroăng cheăng dêi tơná, Khu ối đi đo ngăn hnoăng cheăng tŏng gum rêh ối cho hnoăng cheăng vâ tơdjuôm ivá rơtế ƀă măt trâ̆n tơnêi têa rêm râ, mâu khu tơrŭm cheăng kal kí – rêh ối pơlê pơla vâ tŏng gum tro tâ tơdroăng rêh ối mâu ngế xơpá, malối cho mâu ngế ki châ tơnêi têa gum, rơpŏng kơtiê, veăng gum rak tơniăn tơdroăng gâk kring tơniăn a cheăm pơlê.

“Ing apoăng hneăng troh nôkố ngin hiăng mơhnhôk, mơjiâng pro châ 22 toăng hngêi kơna 1,4 rơtal liăn. Kơxô̆ liăn gá hên, laga, hiăng gum ăm tơdroăng tơdjâk ‘na hiâm mơno Đảng ƀă Tơnêi têa đi đo tơmâng ngăn troh mâu ngế ki châ tŏng gum mâu ngế ki ai tơdroăng rêh ối xơpá vâ tơdjâk tơdroăng loi tơngah dêi kuăn pơlê a Đảng ƀă Tơnêi têa. Ing mê, rơtế ƀă Đảng ƀă Tơnêi têa pêi pro tro hnoăng cheăng tŏng gum rêh ối pơlê pơla vâ pôi tá ai ngế ki lâi tro lôi pa rŏng’’.

A chê pơla kố, tung tơdroăng cheăng dêi tơná, a Hneăng hôp má 8, Kuô̆k hô̆i hneăng 15 dế po a Hà Nội, Khu kăn Kuô̆k hô̆i kong pơlê Dak Lak hiăng ai hên rơkong tơpui ki kal vâ tŏng gum mâu tơdroăng xơpá, tơvâ tơvân a kong pơlê. Ki nhên môi tiah tơdroăng tơbleăng tơkêa Kông 110 (tơdjêp ƀă kong pơlê Gia Lai) ƀă hiăng pêi klêi hên tơdroăng 88%; u ối 12% nôkố dế pơtê xua tơvâ tơnêi ƀă phĭu liăn chin phuh. Kong pơlê Dak Lak hiăng ai mơ-éa pơtroh ăm Khu xiâm ngăn troăng prôk ƀă rơxế kơtâu ngăn, pơtối ‘no liăn pro klêi kông ki kố vâ pôi tá mơ’nhê. Xuân a hneăng hôp kố, Khu kăn Kuô̆k hô̆i kong pơlê Dak Lak hiăng tối tơdroăng ki phá tơ-ê ing tơdroăng ki ai khât dêi kong pơlê, cho kong pơlê ai tơdroăng vâ mơjiâng pro on tơhrik khía, on tơhrik mâ hâi, la nôkố, mâu tơdroăng tơkêa on tơhrik mâ hâi dêi Dak Lak pơhlêh dêi rơpó tê on tơhrik vâ mơ’no troh on tơhrik mâ hâi tơnêi têa, xua tơdroăng ki mơ’no on tơhrik ôh tá rak  tơniăn; pâ thế Chin phuh, Khu xiâm ngăn cheăng kơmăi kơmok tê mơdró tơnêi têa tơmâng ngăm mơjiâng pro troăng klông on tơhrik.

Rơtế amê, Khu kăn Kuô̆k hô̆i kong pơlê Dak Lak xuân pâ thế Khu xiâm ngăn cheăng pêi mố đô̆i tro rong ƀă rêh ối pơlê pơla, Khu xiâm ngăn hnê hriâm ƀă hnê mơjiâng tuăn ngoâ rơkê kal mơnhên tối tơ-ƀrê tơdroăng cheăng dêi mâu tíu xiâm hnê hriâm cheăng pêi, yăo yuk thường xuên vâ ai troăng hnê mơhno, xing xoăng mâu tíu pêi cheăng kố tung tơdroăng ki ai khât, rak tơniăn pơkâ thế mơdêk tơ-ƀrê tơdroăng cheăng dêi mâu tíu pêi cheăng tơdjuôm dêi tơnêi têa.