Hngêi trung Đăi hok Tây Nguyên nôkố ai lối 9.500 ngế hok tro, sinh viên; hnê mơjiâng 5 kơvâ tiê̆n sih, 12 kơvâ thak sih ƀă chuyên khoa râ má môi, 37 kơvâ đăi hok. Rơtế a mê, hngêi trung ối pêi pro tơdroăng khăm pơlât ƀă tơdah rak ngăn ivá kuăn pơlê a Hngêi pơkeăng Đăi hok Tây Nguyên.

Xông tơpui a leh pơxiâm po hơnăm hriâm nếo, Tiê̆n sih Nguyễn Thanh Trúc, Thái pơkuâ Hngêi trung Đăi hok Tây Nguyên tối ăm ‘nâi, Hngêi trung pơtối thăm pêi pro tơdroăng pơkuâ đăi hok; tŭm tâi tâng khu tơrŭm cheăng tiô troăng tơniăn lĕm, xêt khât châ tơƀrê; pêi kêi đeăng tơdroăng tơ’mot chiâng môi Hngêi trung Kao đăng Sư phăm Dak Lak tung Hngêi trung Đăi hok Tây Nguyên; hbrâ mâu tơmeăm vâ mơjiâng đăi hok kơpong hdrối hơnăm 2030.

Hngêi trung kô tơmâng vâ po hên tâ mê nếo troh mâu kơvâ hnê mơjiâng ‘na pêi chiâk deăng xúa kŏng ngê̆ rơxông nếo, kŏng ngê̆ sinh hok tiô Tơdroăng tơkêa dêi Khu xiâm pơkuâ Hnê hriâm ƀă Hnê mơjiâng tuăn ngôa rơkê ‘na ‘’Mơjiâng Tíu xiâm hnê mơjiâng ki dâi lĕm a pơlê kong kơdrâm Ƀuôn Ma Thuột ƀă pơlê kong kơdrâm Đà Lạt’’.