Kơmăng hâi lơ 12/11 a Hà Nội,  koh tơbâ 94 hơnăm hâi mơjiâng Măt trâ̆n tơnêi têa Việt Nam (18/11/20230- 18/11/2024), pôa Tô Lâm,  Kăn xiâm pơkuâ hnê ngăn Đảng hiăng troh veăng Hâi hôp tâi tâng tơrŭm môi tuăn hdroâng mơngế ƀă hên hĭn kuăn pơlê tung bêng Quán Thánh, pơlê krâm Ba Đình.

Kăn xiâm pơkuâ hnê ngăn Đảng tối nhên, ivá rơdêi tơrŭm môi hdroâng mơngế tâi tâng mâu kuăn ngo cho môi tung mâu tơdroăng ki xiâm má môi, rơdêi má môi vâ tâi tâng Đảng, tâi tâng kuăn pơlê, tâi tâng mâu lêng pin kâi tơkâ luâ tŭm tơdroăng pá, pơloăng mơnúa, pê klêi mâu pơkâ tung tơdroăng cheăng kâ rêh ối pơ’lêh nếo, mơnhông tơnêi têa tối tơdjuôm ƀă mơjiâng pơlê kong xiâm hơniâp lĕm, rak tơdroăng ki lĕm ton nah, rơkê plĕng, pêi cheăng rêh ối tiô túa nếo tối  krê.

Tối nhên tơnêi têa pin hiăng tơkŭm tŭm mâu tơdroăng ki kal ƀă dế vâ troh rôh ki lĕm ton nah vâ mot tung mâu hơnăm nếo, mâu hơmăn ki mơnhông tơná dêi mâu hdroâng mơngế, laga vâ ai tiah tơdroăng ki mê, Kăn xiâm pơkuâ hnê ngăn Đảng tối nhên, tung la ngiâ kal pơtối hnê trâu troăng hơlâ “xo Kuăn pơlê pro xiâm tơdế rá, ngế xiâm dêi tŭm troăng  rơhlâ, luât pơkâ”, “xo hơniâp lĕm, phâi tơtô dêi kuăn pơlê cho xiâm ki mơ-eăm’’, tơkŭm lêi tah mâu tơdroăng xơpá, “tíu ki pá’’ vâ pro troăng  tơ’lêi, mơhnhôk tăng ƀă tí tăng pêi ai tơƀrê tŭm tơdroăng, pro rôh tơlêi, pro tơleăng lĕm tŭm tơdroăng mơdêk rơdêi mơnhông cheăng kâ - rêh ối, mơnhông tơdroăng rêh ối tơmeăm khoăng, tuăn ngôa dêi kuăn pơlê, tơniăn ăm rêm ngế kuăn pơlê xuân châ xúa mâu hnoăng hiăng pêi pro pơ’lêh nếo, mơnhông tơbrê, ôh tá ai ngế ki lâi lôi pá rŏng.