Mâu ngế ki lu lêa tối tơbleăng tơdroăng chĕn liăn on tơhrik, mơnhâu tơpâ on tơhrik, pơkâ mâu ngế xúa on tơhrik chêl liăn ƀă troăng pơtroh liăn a tai khoăn hngêi arak liăn; lơ taih phân mêm ki lu lêa a phôn râng kŏng vâ ai hnoăng pơkuâ phôn dêi ngế ki xúa on tơhrik, pêi pro pơtroh kơxô̆ liăn kân.

Kŏng ti On tơhrik Dak Lak mơnhên, rêm ngế pêi cheăng on tơhrik drêng trâm mâ tơpui ƀă mâu ngế ki xúa on tơhrik pơrá tiô hnoăng cheăng tơdah lĕm mâu ngế xúa on tơhrik, ôh tá ai tơdroăng ki tơdah ôh tá lĕm, ôh tá hnê mơhno mâu ngế ki xúa on tơhrik mot tung troăng link, ôh tá pơkâ mâu ngế xúa on tơhrik cai phân mêm ing phôn râng kŏng.

On tơhrik Dak Lak pơchân tối mâu ngế xúa on tơhrik thế kơchăng, ôh tá tơbleăng ăm tơdroăng krê, ôh tá chêl liăn on tơhrik ing tai khoăn hngêi arak liăn drêng tá hâi châ mơnhên, ôh tá cai phân mêm ki tơviah tung phôn râng kŏng. Drêng tơdah châ roh krếo, chêh chư pơtroh nhôm vâi lu lêa tối dêi tơná ngế pêi cheăng kơvâ on tơhrik, mâu ngế xúa on tơhrik kal tơbleăng troh tổng đai 19001909 lơ troh a on tơhrik tơring, kong pơlê vâ châ hnê mơhno, tŏng gum teăm tơdrêng.