Rôh tơ’noăng kố ai tơdroăng ki veăng dêi lối 2.800 ngế hok tro, ƀă lối 200 ƀai hơdruê xuăng lo ing mâu hngêi trung phôh thong ƀă ƀơrô cheăng hnê hriâm ƀă hnê mơhno tung kong pơlê Dak Lak. Ƀă inâi ô eăng pơlê xiâm tơnêi têa, Đảng, Pôa Hồ, tơmiât troh xiâm rêi ƀă tơdroăng pâ nhuô̆m thái – hok tro, rôh tơ’noăng ai hên ƀai ki hâi rơkê, mơhno túa lĕm tro hdroâng kuăn ngo ƀă hên ki ê.

Hên ƀai hơdruê xuăng châ vâi pro krâu ing chêh pro mơ-éa, hnê kơhnhon xuăng, ếo pơtâk xâp ƀă hên ki ê. Pakĭng mâu ƀai hơdruê xuăng ki xiâm cho mơnhên tối tơdroăng cheăng tơ’noăng hơdruê xuăng tung hngêi trung; Rôh tơ’noăng "Giai điệu tuổi hồng” ối cho rôh vâ mâu thái cô ƀă mâu vâi o hok tro a Dak Lak hriâm ƀối, tơpui tơno ăm dêi rơpó ki rơkê plĕng, tơrŭm krá tơniăn, pro chiâng tơdroăng ki hơniâp ro, hâk phiu mơjiâng “Hngêi trung hriâm hmâ achê – hok tro kơhnâ rơkê”.