Mơđah tơbleăng vâ chê 100 tơdroăng chêh ton nah ƀă nôkố mơhno hnoăng ki Việt Nam pơkuâ ƀă 2 to chuăn Trường Sa ƀă Hoàng Sa. Môi tiah lơ gât Việt Nam a rơxông pơtáu pơkuâ ngăn (sap chal 16 - 19), Hlá mơ-éa chêh tối nếo ƀă Hlá mơ-éa chêh a chal pơtáu Nguyễn nah; Lơgât kơchuâ chêh a mâu kong têa ki môi tuăn ƀă Mih ai kơchuâ chêh a (chal sap 16 - 19), lơgât Sinuâ xua mâu kong têa môi tuăn ƀă Mih ai kơchuâ chêh xup xo a (chal 16 - 20).  

Hên mâu um, hlá mơ-éa chêh ‘măn ing ton nah ai tối ‘na chuăn Hoàng Sa hdrối hơnăm 1975, mâu um ‘na chuăn Trường Sa nôkố ƀă mâu tơdroăng pêi pro dêi mâu kăn Đảng, Tơnêi têa ƀă mâu kăn ƀô̆, mâu lêng tuk, kuăn pơlê rêh ối a chuăn Trường Sa. Hơnăm 2019 troh nôkố, kong pơlê Dak Lak hiăng tơkŭm po 8 rôh mơđah tơbleăng tơmeăm hlá mơ-éa pơxá ‘na tơdroăng mê a mâu tơring MDrăk, Ea Kar, Ea Súp, Krông Bông, Ea Hleo, Čư̆ Kuiñ, Krông Ƀuk ƀă pơlê kong krâm Ƀuôn Hồ.