Pơchốu a pơtâk ki dế dâi mê, nâ K’Hều, ối a thôn 1, cheăm Dưng K’Nơ̆, tơring Lạc Dương, kong pơlê Lâm Đồng hơniâp ro tối, kố cho ếo pơtâk ki ing tơná nâ tĕn châ 2 pơla măng tĭng. Nâ K’Hều hơ’muăn tối, hên vâi nâ o tung thôn brôk dêi pó hriâm teăn hmôu, jiâ, drêng tối mâu tơmeăm khoăng ki mơ’no tê a facebook, zalo, mê khoh châ ai hên ngế rơhêng vâ tí tăng rôe.

“Pin ‘măn, mơhno tơmeăm tung facebook tiah mê, ai mơngế ki tơná tối tâng pin teăn mơjiâng tơmeăm ki lĕm mê vâi kô rôe môi péa plâ tơmeăm ki pin teăn mê. Pin ‘nâi kô chiâng vâ tê tơmeăm ki pin teăn mơjiâng vâ tí tăng liăn ngân vâ mơnhông dêi tơdroăng rêh kâ ối tơná. Mê cho tơdroăng ki pro ăm pin thăm rế kơdo mơ-eăm, khŏm chiâng teăn hên hmôu jiâ. La ngiâ kố ah á kô pơtối hriâm hên tâ nếo”.

Ƀă nâ Bon Niêng Khuyên, rơtế ối tung thôn ai tối, kơnôm châ rơkê teăn tơmeăm mê nâ ai tơ’nôm liăn ngân tung pơla toh chôu.

“Pin hriâm ƀă ‘nâi teăn hmôu jiâ hiăng châ 1 hơnăm kố. Drêng toh chôu mê á teăn tê a Lạc Dương ai to lâi ngế rôe, yă tê dâng 550-600 liăn 1 plâ, ai khế ki ‘nâ xuân hiăng teăn châ 4 plâ. Dế nôkố dế hâk git khât tơdroăng ki hriâm teăn, vâ pơtối vêh po nếo lâm hnê tơdroăng cheăng teăn hmôu jiâ vâ pôi ta hía khôi túa, vêa vong dêi hdroâng kuăn ngo tơná”.

Drêng nhŏng o hiăng vâ rôe tơmeăm ki tĕn rế hên, mâu vâi nâ tơkŭm mơjiâng khu ki tĕn vâ mơjiâng tơmeăm tơná ai hên tíu ki châ tê hên tâ. Nâ Bon Niêng K’Gut, ối a thôn 1, cheăm Dưng Knơ̆ tối ăm ‘nâi, kơnôm châ tơrŭm ƀă Caritas Đà Lạt, khu teăn hmôu jiâ dêi nâ hiăng ai hên ngế pâ rôe tơmeăm, môi tiah pơtâk ếo ăm hâi pơkŏng, tơmeăm ki rơnuâ kơƀăng tăng, hngêi trăng, hmân ếo, pơtâk  kuăn ngo tiô túa ki nếo ƀă hên mâu tơdroăng ki ê. Nâ ối po lâm hnê a hngêi vâ ai tơ’nôm mơngế ki veăng teăn tơmeăm.

“Á vâ pơtối mơdêk tơdroăng cheăng tĕn hmôu jiâ, po rơdâ tơdroăng kố troh a mâu vâi droh rơtăm ki ê, veăng gum mơnhông khôi túa, vêa vong dêi kuăn ngo tơná. Hiăng po lâm ing hơnăm nah, po lâm má 15 ăm 5 ngế hriâm, nôkố vâi hiăng chiâng teăn ƀă hiăng châ tê dêi tơmeăm. Kơnôm ai Caritas veăng gum mê hiăng chiâng khu ki veăng tê rôe ki ngin. Ai ngế ki kơ’nhâm prế, ai ngế ki toi, vế prế, ai ngế pêi ki kố ki tá vâ mơjiâng pro hên kế tơmeăm, tơtro ƀă tơdroăng ki mơngế kal vâ rôe la ga ôh tá hía lôi ‘na khôi túa, vêa vong dêi hdroâng kuăn ngo tơná”.

A kơpong hơngế hơngo dêi tơring Lạc Dương ai lối 90% pơ’leăng mâ mơngế cho hdroâng kuăn ngo ki iâ mơngế, pơla hdrối mê hía nah, cheăm Dưng K’Nơ̆ hiăng châ hên tơdroăng tŏng gum, ngăn khât dêi Đảng ƀă Tơnêi têa, mơjiâng pro hngêi trăng, troăng klông, hngêi trung, hngêi pơkeăng. Cheăm hiăng châ mơnhên tối cho thôn pơlê nếo hơnăm 2021. Ing khế 7 hơnăm kố, tơring Lạc Dương pơtâng tối ‘na Pơkâ mơjiâng pro Pơlê túa lĕm tro ôm hyô pơlê pơla cheăm Dưng K’Nơ̆ hiăng po tơdroăng ki mơhno tối ‘na khôi túa lĕm tro tiô khôi hmâ ƀă hnối mơnhông ôm hyô dêi pơlê tơná.

Jâ Phi Srônh K’Ham, Kăn hnê ngăn Khu vâi kơdrâi cheăm Dưng K’Nơ̆ tối ăm ‘nâi, kơnôm ing ai troăng hơlâ pơkâ dêi tơring, mê khu pơkuâ ngăn vâi kơdrâi hiăng mơhnhôk, tơkŭm mâu vâi nâ o pơtối mơnhông tơdroăng cheăng teăn hmôu jiâ, mơjiâng chiâng pơlê cheăng pro ‘na ôm hyô.

“Pơtối mơdêk khôi túa, vêa vong dêi hdroâng kuăn ngo vâ pơtối hnê ‘măn, rak vế ăm rơxông kơ’nâi mê mâu vâi nâ o akố xuân châ hriâm, châ mơnhông hnoăng cheăng teăn tơmeăm khoăng, kế tơmeăm ki mơjiâng mê châ mơnhông hên cho lĕm păng ‘nâg, thăm mơdêk ki pêi lo liăn ngân ăm mâu vâi nâ o. Dế nôkố, ai troăng hơlâ ki tŏng gum, Khu pơkuâ ngăn vâi kơdrâi dế tơkŭm châ 20 ngế nâ o dế kal vâ châ mung liăn ngân vâ rôe prế, teăn hmôu jiâ, rêm rơpŏng châ mung dâng 50 rơtuh liăn”.

Ƀă mâu troăng hơlâ ki nhên dêi khu kăn pơkuâ ngăn tơring, cheăm ‘na kring vế, rak ngăn pơtối mơdêk khôi túa, vêa vong, hnoăng cheăng dêi kuăn ngo, hên vâi kơdrâi hdroâng K’Ho a cheăm kơpong hơngế hơngo Dưng KNơ̆ dế vêh mơnhông nếo tơdroăng cheăng tĕn hmôu jiâ, mơjiâng pro túa ki mơjiâng tơmeăm khoăng, ing mê, teăn pro hên tơmeăm khoăng ki xuân ối rak vế khôi túa ton, xuân rak vế tơmeăm khoăng chal nếo dêi hdroâng kuăn ngo. Teăn hmôu jiâ ôh ta xê to gum ăm kuăn pơlê châ pêi lo liăn tơniăn, mê po rơdâ ăm tơdroăng ki mơjiâng chiâng pơlê túa lĕm tro ôm hyô dêi thôn pơlê ki nếo.