Pơxiâm po leh kố ngăn krip tơdrŏm khât ƀă tơdroăng ki ai mâ dêi lối 100 ngế ngê̆ nhân, mơđah hơdruê xuăng tiô tơdrá chêng koăng tơdah mâu kăn ƀă tơmối ôm hyô. Rơtế ƀă mâu khu ki tŏn chêng koăng cho mâu khu ki kơhnhon xuăng, rơnuâ tiô mơngiơk túa lĕm tro dêi hdroâng kuăn ngo Jarai prế Bơhnéa. Tung tíu ki po leh, khu tơkŭm po ối xuăng hên tíu ki tê tơmeăm chôu vế, kế kơhiâm dêi kong pơlê, kế tơmeăm pêi lo ing chiâk deăng thôn pơlê ki xiâm môi tiah kơphế, tiu, priât kong, drôu xiâm, tơpăng khăng, ká ‘leâp kroăng Sê San; mâu tíu ki tê kế tơmeăm pơxiâm pêi cheăng dêi droh rơtăm, vâi kơdrâi; kế tơmeăm dêi khu pêi cheăng tơrŭm pêi chiâk deăng a tơring Čư̆ Păh.

Măng tĭng Reăng mâ hâi kong – Ngo on Čư̆ Đang Ya hơnăm 2024 kô po troh tâi hâi lơ 10/11. Rơtế ƀă tơdroăng ki tăng ngăn ki lĕm dêi ngo on ƀă mơngiơk reăng mâ hâi kong rơ-eăng lĕm, tơmối ai rôh châ mơnúa ngăn tơdrêng tĕn pong, tĕn ếo pơtâk rơtế ƀă mâu ngê̆ nhân, châ xah mâu tơdroăng xah chal krâ nah a rôh po mơdĭng môi tiah: Trut loăng, to chĕng klĕng, hrot kơxái, tơ’noăng kơxâk, hếo ngo.