Klêi kơ’nâi leh tơdah păng ‘nâng, pôa Lương Cường, Kăn xiâm hnê ngăn tơnêi têa rơtế ƀă kăn xiâm pơkuâ kong têa Gabriel Boric Font hiăng pơkuâ djâ khu kăn xiâm péa tơnêi têa hôp tơpui tơno vâ tơpui mâu troăng hơlâ veăng gum pro trâu hngếm tơƀrê tâ nếo tơrŭm cheăng tŭm têk pơla péa tơnêi têa. Péa pâ hiăng tơbleăng tơdjuôm vâ pro trâu hơngế tâ nếo tơrŭm cheăng tŭm têk Việt Nam – Chile.

Péa pâ xuân hiăng kĭ mâu hlá mơ-éa tơrŭm cheăng tung mâu kơvâ cheăng tê mơdró ngi kong têa e, pêi chiâk deăng, tơdroăng cheăng lêng, tơrŭm péa tơnêi ƀă mâu kơvâ cheăng kal ki ê vâ pro tơ’lêi hlâu ăm mơnhông rơdêi tâ nếo tơrŭm cheăng tŭm têk pơla péa tơnêi têa; tơdrêng amê hlối môi tuăn ‘na tơdroăng ki pơtối mơdêk po rơdâ tơrŭm cheăng ƀă tơpui tơno tơdroăng ki rơkê plĕng tung mâu kơvâ cheăng ki péa chiâng vâ tŏng gum dêi rơpó môi tiah rak vế kong prâi tơnêi tơníu, hbrâ ví ƀă kong prâi pro pơhlêh, mơdêk ngiât, krá tơniăn, uâ pơliê tơmeăm pêi lo ing chiâk deăng, po pông tơnêi, pơhlêh nếo tơmiât rơkê.