Tíu ki má môi châ krâ a thôn Tu Thó, cheăm Tê Xăng ƀă tíu má 2 châ krâ ‘măn a thôn Đăk Dơn, cheăm Măng Ri. Tâi tâng kơxô̆ liăn ‘no ăm tơdroăng ki krâ ‘măn 2 to tíu mơ’no hyôh kố cho vâ chê 1 rơtal liăn. Hdrối nah hyôh viễn thông a kơpong kố ôh tá kâi hrik tơdroăng ki xúa phôn râng kŏng vâ tơpui dêi mâu ngế ki pêt sâm Ngọc Linh trâm hên xơpá.

Xuân xua hyôh ôh tá kâi hrik mê mơngế pêt sâm ôh tá chiâng vâ krâ camera vâ rak ngăn kơdrum sâm pơkeăng kong. Klêi kơ’nâi ai tíu mơ’no hyôh, hiăng ai 7 rơpŏng kuăn pơlê a cheăm Măng Ri, tơring Tu Mrông krâ camera vâ rak ngăn kơdrum sâm Ngọc Linh dêi rơpŏng. Mâu rơpŏng kuăn pơlê ai kơdrum sâm Ngọc Linh tơdjêp dêi rơpó xuân châ pơxúa ing tơdroăng ki séa ngăn, pơkuâ tơdjuôm kố.