Ƀă dó inâi ‘’Dak Lak – Pói vâ eăng lâp lu’’, tơ’noăng tơkŭm po sap ing kố troh tâi hâi kơxo hâi lơ 9/11, ƀă vâ chê 350 ngế kăn ƀô̆, ngế pơtâng tối dêi 13 tíu cheăng tơring, pơlê kong krâm ƀă pơlê kong kơdrâm tung kong pơlê Dak Lak veăng. Rơtế ƀă ăm rơxế prôk pơtăng pơtâng tối troh lâp lu, rêm tíu cheăng kô pêi pro môi tơdroăng pơtâng tối tâi tâng ƀă tơdroăng xiâm kheăn kơdeăn Đảng, Pôa Hồ, tơdroăng tuăn pâ pơlê xiâm tơnêi têa, khôi túa kăch măng dêi khu lêng ƀă kuăn pơlê mâu hdroâng kuăn ngo, mâu tơdroăng châ tơƀrê tung mơjiâng ƀă mơnhông cheăng kâ – rêh ối pơlê pơla, gâk kring tơnêi têa – gâk kring pơlê pơla, gâk kring hnoăng pơkuâ tơkăng kong, têa kơxĭ, rơlố.

Tung mê, tối nhên mâu tơdroăng châ tơƀrê hluâ 120 hơnăm kong pơlê Dak Lak mơjiâng ƀă mơnhông ƀă hiâm mơno rŭm môi tuăn dêi 49 hdroâng mơngế rơtế rêh ối tung kơpong tơnêi Dak Lak. Kố cho tơdroăng châ tơkŭm po rêm hneăng 2 hơnăm môi xôh vâ mơnhên ki châ tơƀrê tơdroăng pơtâng tối troăng hơlâ dêi Đảng, troăng hơlâ luât dêi Tơnêi têa troh mâu râ kuăn pơlê; pro tơ’lêi hlâu trâm mâ tơpui tơno, mơdêk châ tơƀrê tơdroăng pơtâng tối a pơlê pơla.