A rôh tơdah, Pôa Lương Cường, Kăn xiâm hnê ngăn tơnêi têa pin mơnhên tối khât tơdroăng ki péa tơnêi têa, péa đảng tối hên tơdroăng ki môi tiah dêi pó ‘na tơdroăng ki rơhêng vâ tơniăn krê tơdâng tơ’mô, tơdâng tơ’mô, pơlê pơla rơkê plĕng tung ivá tơrŭm cheăng krá rơdêi, tối ăm dêi rơpó ki pơxúa tơdjuôm, ai hlâu vâ po rơdâ tơrŭm cheăng, ‘mot tơ’nôm ƀă tŏng gum dêi rơpó tung pơla mơnhông xua pơxúa ăm kuăn pơlê rêm kong têa xua hơniâp lĕm, tơrŭm cheăng mơnhông a kơpong ƀă a kong têa ê.

Kăn xiâm hnê ngăn tơnêi têa tối nhên, Việt Nam púi vâ tơrŭm ƀă mâu kong têa pú hmâ a kơpong Mih Latinh, malối cho ƀă Chile, tơnêi têa ki kal xiâm, ai hnoăng cheăng pơkuâ djâ tung rôh mot tơrŭm cheăng tung kơpong, tơrŭm tung kơpong ƀă rế hía rế cho hnoăng cheăng ki kal tâ tung mâu tơdroăng dêi lâp plâi tơnêi. Kăn xiâm hnê ngăn tơnêi têa púi vâ tung la ngiâ ah, péa Đảng kal thăm mơdêk tơrŭm krá tơniăn ƀă tơbleăng tơƀrê tơkêa tơrŭm cheăng pơla péa Đảng, tơdrêng amê hlối pơtối ‘mâi nhông tơdroăng loi tơngah khu râ kăn xiâm ƀă tơdroăng tơrŭm cheăng tŭm têk pơla péa tơnêi têa, malối cho tung mâu kơvâ cheăng ki péa pâ ki rơdêi.

Tung rôh lăm pôu, pôa Lương Cường, kăn xiâm hnê ngăn tơnêi têa pin hiăng troh pôu hngêi pôa Salvador Allende, kăn xiâm pơkuâ kong têa Chile ki hiăng hlâ, môi ngế pú hmâ kân dêi Hồ Chí Minh ƀă kuăn pơlê Việt Nam; pleăng rơvĭng reăng tơbâ Kăn xiâm hnê ngăn tơnêi têa Hồ Chí Minh a Chile.