Hluâ 10 hơnăm pêi pro pơkâ 217/2013 dêi Khu xiâm kal kí, Kŏng đoân ƀă Măt trâ̆n Tơnêi têa mâu râ hiăng pơkuâ ƀă veăng vâ chê 144 rơpâu roh séa ngăn, vâ chê 80 rơpâu roh tiâ tối pơlê pơla; ai lối 408 rơpâu mơ-éa pâ thế klêi kơ’nâi séa ngăn, ƀă lối 39.200 mơ-éa pâ thế klêi kơ’nâi tiâ tối; ai lối 33 rơpâu mơ-éa tiâ tối ing mâu kơ koan, khu tơrŭm cheăng châ séa ngăn ƀă ai mơ-éa chêh hdrối châ tiâ tối.

Pakĭng mâu tơdroăng ki hôm, tơdroăng pêi pro Pơkâ 217 xuân ối iâ pá puât tơvâ tơvân. Pôa Vũ Hồng Quang – Kăn cheăng tung Khu pơkuâ, Kăn phŏ Khu pơkuâ troăng hơlâ luât Tổng Liên đoân pêi cheăng Việt Nam tối ăm ‘nâi, mâu tơdroăng ki ai kố kô châ Tổng Liên đoân pêi cheăng Việt Nam pơtối tơ’nôm ƀă tơbleăng tung tơdroăng mơjiâng luât ƀă mâu mơ-éa luât tung hneăng nếo.