Kăn teăng mâ mâu kuăn pơlê rơkâu pôa Tô Lâm, Kăn xiâm hnê ngăn tơnêi têa hiăng châ Đảng, Kuô̆k hô̆i loi tơngah pơcháu hnoăng cheăng nếo, mơhno tơdroăng kheăn kơdeăn ki má môi dêi Hneăng hôp má 7 pơla kố nah, drêng Kuô̆k hô̆i hiăng pêi kêi đeăng hên tơdroăng cheăng mơjiâng luât, pơkâ hên tơdroăng ki kal dêi tơnêi têa. Pôa Tô Lâm, Kăn xiâm hnê ngăn tơnêi têa tối, tơdroăng châ loi tơngah, rah xo to pro hnoăng cheăng nếo cho hâk tơngăm, laga xuân cho tơdroăng cheăng kân, mơhno tơdroăng pói vâ pơtối châ tơdah tơdroăng tŏng kum, tơpui tơno, veăng tơpui dêi mâu kuăn pơlê vâ kô kêi đeăng hnoăng cheăng châ pơcháu dêi kăn xiâm hnê ngăn tơnêi têa, kêi đeăng hnoăng cheăng cho ngế teăng mâ dêi kuăn pơlê.

A roh trâm mâ, Kăn xiâm hnê ngăn tơnêi têa tơpui tơno ƀă kuăn pơlê ‘na hên tơdroăng ki nhên tơbleăng, tơdrăng tung tơdroăng pơkâ pêi; pro ti lâi vâ mơdêk châ tơƀrê tơdroăng hbrâ mơdât on chếo, tŏng xo mơngế hliăng tiâ; ‘na mâu tơdroăng ối tơvâ tơvân tung tơdroăng pơkuâ ƀă pơkeăng rak khăm pơlât ƀă hên tơdroăng châ kuăn pơlê tơmâng kô châ Kuô̆k hô̆i séa ngăn, tơbleăng ăm pêi pro a hneăng hôp má 8 la ngiâ./.