Kuân khu 9 pro đông tung 12 kong pơlê, pơlê kong kơdrâm Tơbăng kroăng Cửu Long, ai tíu pêi cheăng ton xŏn ki kal. Tung tơdroăng tơplâ tơleăng lĕm, khu lêng ƀă kuăn pơlê Kuân khu 9 hiăng ai mâu tơdroăng veăng kân kĭn tung ƀlêi trâng kân dêi hdroâng mơngế.

Xông tơpui a roh pêi cheăng, pôa Trần Thanh Mẫn pơchân tối, Kuân khu 9 kal thăm veăng kum Kuăn pơlê xăm kơklêa, kơdroh kơtiê, mơjiâng thôn pơlê nếo, mơnhông khôi túa lĕm – rêh ối pơlê pơla; hbrâ, mơdât, rơnêu kế tơmeăm xua kong prâi pro ôh tá tơniăn, têa kân lân lu, pơreăng, ti tăng tŏng xo mơngế hliăng tiâ. Tơrŭm ƀă khu kŏng an, Mô đô̆i gâk tơkăng kong, mâu tíu cheăng dêi Khu xiâm ai tơdjâk ƀă khu râ kăn pơkuâ kong pơlê, khŏm tơplâ hbrâ, mơdât mâu ngế xôi, mơjiâng kong pơlê tơniăn ƀă đông lêng tơniăn; hbrâ tơplâ pro tơ’nhê mâu tơdroăng ki ‘mêi, troăng vâ hbrâ mơdât dêi mâu ngế ki hêng hôu tơnêi têa.

Kăn xiâm hnê ngăn Kuô̆k hô̆i pơkâ, Kuân khu 9 đi đo tơmâng rak ngăn lĕm troh tơdroăng rêh ối kế tơmeăm khoăng, hiâm mơno dêi kăn ƀô̆, mâu lêng. Pêi pro lĕm tro tơdroăng troăng hơlâ, tŏng kum parŏng dêi khu lêng.