Tơ̆ 1 ‘măng plang song pham yua đơ̆ng Liên đoàn Lao động dêh char Lâm Đồng jang hơdai hăm Jơnŭm vei lăng ‘long pơglang ƀrê dêh char pơgơ̆r tơ̆ Đà Lạt, mŏ Phạm Thị Hồng, đoàn viên công đoàn anih jang pơtho pơhrăm lăng ƀôh: ‘nâu jĭ tơdrong jang tôch kơ ‘lơ̆ng kơna kăl kơ đei pơvei păng pơgơ̆r hơ nơ̆ng, sơng đei dơ̆ng lơ bơngai lơ̆m tơpôl vang akŏm plang song.

“Ƀơ̆t iŏk đei roi tơbăt đei năr plang song pham tơ̆ hơnih âu ‘noh ‘nhŏng oh thây kô pơtho tơ̆ hnam trưng năm plang song kơ dih lơ̆m jơhngơ̆m đon tôch kơ hiôk. Ĭnh tơchĕng ‘noh tơgop tŏ sĕt hơyơ ‘noh ăn tơpôl ‘noh ƀôh tôch kơ hiôk chơt”.

‘Nâu jĭ 1 lơ̆m dôm tơdrong jang ‘lơ̆ng oei lơ̆m tơdrong jang hơdai đơ̆ng Liên đoàn lao động dêh char păng Jơnŭm vei lăng ‘long pơglang ƀrê Lâm Đồng jăl jang 2019 – 2023, vă hơnơ̆ng hơtŏk tơdrong joăt joe plang song pham pơyua ăn tơdrong jang kâp kư̆u, hơmet, răk hiă lơ̆m dôm tơdrong kăl, ưh kơ ê, pơm lăp ‘meh vă lơ̆m tơdrong jang dŏng hơmet bơngai jĭ.

‘Nao âu, Anih pơgơ̆r jang krao hơvơn plang song pham tơgŭm dêh char Gia Lai pơgơ̆r hop akŏm pơtôch tơdrong jang plang song pham tơgŭm sơnăm 2022, tơlĕch trong vă jang sơnăm 2023. Kiơ̆ roi tơbăt, sơnăm ‘nâu lơ̆m dêh char Gia Lai hlôi pơgơ̆r tơlĕch jang đei 84 ‘măng plang song pham tơgŭm, pơtôch sơng iŏk đei hloh 18 rơbâu tơpu pham, iŏk đei 120% tơdrong hơgăt đei pơ jao. Lơ̆m noh, Hnam pơgang Đa khoa dêh char Gia Lai hlôi sơng iŏk hloh14.600 tơpu pham păng Hnam pơgang Quân y 211 sơng iŏk hloh 3300 tơpu pham. Đei 416 tơpu pham kăl hlôi đei pơ truh tơtom ăn kơ dôm anih jang pơgang vă kâp kư̆u bơngai jĭ. Ƀok Dương Đình Diện- Phŏ kơdră Anih pơgơ̆r jang krao hơvơn plang song pham tơgŭm, Kơdră Jơnŭm vei lăng ‘long pơglang ƀrê dêh char Gia Lai, tơroi:

“ Sơnăm 2022 hăm tơdrong pơgơ̆r kơtang đơ̆ng Anih vei lăng kon pơlei dêh char kŭm nhen Anih pơgơ̆r krao hơvơn plang song pham tơgŭm dêh char ‘noh jơhngơ̆m lang să lơ̆m tơdrong jang plang song pham tơgŭm đei lang să jơ̆p jang lơ̆m rim răih kon pơlei păng roi ‘năr roi sơng đei lơ kon pơlei vang jang tơdrong jang plang song pham tơgŭm. Nhôn băt hơdăh dôm năr đơ̆ng rŏng dơ̆ng jang kiơ̆ ‘noh nhôn hơdrin lang să tơdrong jang ‘mêm mơ nat, plang song pham dŏng bơngai vă tơpôl kon pơlei vang jang tơdrong jang plang song pham tơgŭm tơ̆ hơnăp kơnh.”

Tơ̆ Dak Lak, Anih pơgơ̆r jang krao hơvơn plang song pham tơgŭm dêh char kŭm hlôi pơgơ̆r Hop akŏm pôk pư bơngai plang song pham ‘lơ̆ng sơnăm 2022. 52 ‘nu bơngai ‘lơ̆ng lơ̆m tơdrong jang plang song pham tơgŭm hlôi đei pôk pơ ư lơ̆m ‘măng ‘nâu. ‘Nâu jĭ dôm bơngai vang plang song pham lơ ‘măng lơ̆m sơnăm 2020 păng 2021. Ƀok Nguyễn Tấn Chờ, rơneh sơnăm 1967, oei tơ̆ thôn Tiến Thịnh, xăh Quảng Tiến, apŭng Cư M’gar, dêh char Dak Lak hlôi 48 ‘măng plang song pham tơroi akhan:

“Ĭnh ƀôh thoi âu, ĭnh kăl kơ pơm tŏ sĕt yă kiơ ‘noh vă tơgŭm ăn dôm bơngai tơƀơ̆p ưh kơ pŭn ai lơ̆m tơdrong arih sa. Truh dang ei ĭnh kŭm hlôi đei 48 ‘măng plang song pham păng kŭm chih măt plang song klơm, plei nuih...vă đơ̆ng rŏng âu mă khan ĭnh lôch hê̆ ‘noh ĭnh kŭm ‘măn lê̆ tŏ sĕt kiơ ‘noh ăn tơdrong arih, ăn bơngai nai. Kơdih dôm bơngai kon lơ̆m ŭnh hnam ĭnh kŭm năm plang song pham păng ĭnh kŭm ‘meh tơtă hăm rim bơngai, bơ̆n ‘nĕ kơ tơchĕng ưh kơ ‘lơ̆ng lơ̆m tơdrong plang song pham pơrăm ăn jơhngơ̆m pran mă plang song pham tơ̆ âu, mă hơdrol ‘noh bơ̆n dŏng bơngai, mă 2 ‘noh sư tơgŭm hơkâu jăn bơ̆n tơplih pham, hơkâu jăn pran ưh kơ đei pơrăm ăn jơhngơ̆m pran jăng.”

Dak Lak jĭ 1 lơ̆m jĭt dêh char dơ̆ng hơ drol lơ̆m teh đak găh tơdrong jang plang song pham tơgŭm. Dêh char dang ei đei 200 Khŭl pơgơ̆r jang plang song pham tơgŭm tơ̆ rim tơring; 8 Kâu lak ƀô̆ krao hơvơn plang song pham păng plang song pham hơmet hiă hơdrol... Jô̆ păh lăp rim sơnăm dêh char đei dang 30.000 ‘nu chih măt plang song pham, sơng iŏk hloh 20.000 tơpu pham.

Yă H’Yim Kđoh, Phŏ Kơdră Anih vei lăng kon pơlei dêh char, kơdră Anih pơgơ̆r plang song pham tơgŭm dêh char Dak Lak akhan, đei đăi jơnei âu ‘noh gơnang đơ̆ng lơ̆m tơdrong mơ̆t jang hơdrin đơ̆ng dôm bơngai jang lơ̆m Anih pơgơ̆r plang song pham tơgŭm rim tơring, rim anih jang, tơring păng tơdrong jang ‘lơ̆ng hơiă đơ̆ng bơngai jang tơgŭm.

“Tơ̆ hơnăp kơnh hơnơ̆ng krao hơvơn lơ bơngai vang plang song pham ƀiơ̆, păng ‘meh vă đĭ đăng dôm bơngai pran jăng đei tơdrong vang tơgŭm truh hăm bơngai jĭ. ‘Nâu kŭm jing tơdrong hơmĕng ăn đĭ đăng bơngai jĭ păng bơ̆n lui ngeh akhan hăm tơdrong kơrŭn đĭ jơhngơ̆m đơ̆ng pơ đĭ khŭl jang chĭnh trĭ kŭm hăm đĭ đăng dôm hơdrĕch hơdrŭng lơ̆m dêh char Dak Lak gô đei lơ tơdrong ƀet tơmơ̆t pham ăn bơngai jĭ vă bơngai jĭ đei 1 tơdrong arih sa ‘lơ̆ng hơ iă hloh.”

       ‘Nao âu, tơ̆ pơlei tơm Buôn Ma Thuột kŭm hlôi pơgơ̆r lêh tơƀôh muh măt Kâu lak ƀô̆ grŭp pham khăi RH- dêh char Dak Lak. Kâu lak ƀô̆ đei 3 grŭp hăm 43 ‘nu, jĭ dôm bơngai đei grŭp pham RH-, găh tơpôl bơngai đei grŭp pham khăi. ‘Nâu jĭ hơ nih akŏm, 1 jơhngơ̆m đon dôm bơngai jang lơ̆m khŭl vă pơjing khŭl jang plang song pham hơmet hiă, pơm bơngai đei grŭp pham khăi vang plang song pham tơgŭm sơđơ̆ng.