VOV4.Bahnar - Tơdrong vei răk păng iŏk yua glăi dôm kơ loăi phao kơtoang, tơmam đôh đei hơmơt lơ ưh kơ pŭn ai, pơm ưh kơ sơđơ̆ng tơpôl, ƀơ̆t lăp krê hơmơt truh hơkâu jăn. Tơdrong pơm vei răk păng iŏk yua glăi dôm kơloăi tơmam đôh, phao kơtoang (jô̆ hloi phao chă pơm kơdih) ‘noh jĭ pơm glăi khôi luơ̆t. Khei ‘năr âu ki, tơ̆ 1,2 pơlei pơla tơring hơtăih hơtŏ, khŭl lĭnh kơ pal chă ƀôh lơ bơngai ôn iŏk yua dôm kơ loăi phao chă pơm kơdih. Tơdrong ‘nâu ưh khan lăp pơm glăi khôi luơ̆t đĕch mă oei krê hơmơt truh hơnăn jăn. Pơm tông năr ‘nâu pơma dơnuh găh tơdrong ‘nâu.