Asal kadha gheih ghang karei angaok khan ao di urang kamei bangsa LoLo juk hitam ieu lac bruk pagam 4 sambo bar hijao, bhong, bhong maraih, ingu yau tanrak hadah di dunya alam, angaok tangin ao saong gilaong tangin ao. Khan ao di urang bangsa LoLo juk hitam oh sajanih lac hu yaom kaom ka gah ngak gheih meta maong, brei mboh hatai sahnang mboh rilo gah di bangsa nan bo daok brei mboh bruk gheih ghang di bruk ciuk rambah, kham merat, gheih tangin tapa dom jalan jhik. Gaok mai, daok lac sa asal kadha piah urang lakei LoLo juk hitam ruah kamei gheih tangin, tari taring.

Langiu di bingula khan ao hu ngak gheih meta, nduan meng hala ieu lac janih ndap nda oh kurang hu di dalam ilamu ngui cuk urang kamei bangsa LoLo juk hitam. Nduan maom dahlau abih di nyu ieu lac janih ndap panda ngak meng tangin biak karei, brei mboh tangin gheih, meta thau maong di urang pak nduan, ndung bak ilamo di urang bangsa LoLo juk hitam.

Nduan ngak meng hala hu rabha jeng dua janih. Nduan ma-om nao darak, nao me-in harei raya, atau dalam adat paling yang bhian hu ngak gheih jang, kajap jang dut gheih ghang jang dut tui dom baoh nduan ma-om nao ngak apuh, meng bruk ruah hala, pak gak saong ngak gheih. Ngak nduan meng kreim la-a. Kreim saong la-a brei ruah phun kajap, khang, tapak gauk piah blah jeng kanrih sit saong kanrih praong. Talei hu neh tabiak jeng dang talei saong pambu thu asar dalam dhan bangu sa janih  phun yau phun moóc (di ini ieu lac "rò xí").

Baoh nduan nyu vil, khom nyu hanjuel, davang praong labaih 50cm. Bruk pak nduan meng hala ieu lac sa bruk ngak brei liti litaih. Mbaok angaok meng tabung nduan hu 5 dang kanrih talauk jeng dua saong pambuak gilac haong gauk, blaoh rabha samu meng tabung nduan dui trun tui thaik thaot tadik, dom dang talei kanrih pak gilac haong gauk ngak jeng mata hanyol thaik thaot lime mata sit, pak vil tui meng tabung nduan trun labaih 20cm ye blaoh pandar kanrih la-a vil, mbeik vaiy ngak 2 nẹp saong pandar "rò xí" kak gilac. Meng tabung nduan, dom dang kanrih kanuai pak tame samu di gavang nduan, hu kak khik haong gauk meng dom kanrih la-a vil ngak tanrak yau ia harei. Dang kanrih kanuai hu ngak meng la-a juk – janih la-a biak kan si duah, tamuh di bhum ceik glaong angaok 1.300m.

Dalam nduan hu brei ngak pak gak liti litaih. Dahlau daih, urang LoLo juk hitam mek siaok di anek meduan, min urak ini urang pandar dom candah kareih sit piah piah ka nyu tanrak pasang. Talei nduan hu ngak meng talei mrai atau len rilo sambo bar pakajap gilac, kak 4 kieng ngak kuai saong palao 2 dalah atah. Kayua tui cara thaik thaok baoh nduan saong rilo jeng ye hu bruk cak mbuk di anek kamei urang banga LoLo juk hitam, yau nan ye tuk maom nduan, vak talei kuai ba gah lakuk.

Nduan ngak meng hala ndam pagam khang kajap saong raidiuk urang bangsa LoLo juk dalam rilo labik daok dang mbang ngui, tuk tagok apuk, tuk nao darak, nao me-in raya. Hu kadha biak karei lac, nduan ngak hala ieu lac sa janih ndap kaya oh kurang hu di dalam adat cambat paling grauk yang mabang di bangsa LoLo juk hitam. Yaom lac harei lakhah atau harei ngak dhar phol. Yaom mada ngak yang dalam baoh sang jeng ye di bol bhap rahra palei pala.

Kaya ngui khan ao di urang bangsa LoLo juk hitam biak gheih ghang sambo bar, jalan jhik siam makre, rilo janih rak kaong, nyuk, karah, bruei tangi. Langiu di nan, asal kadha ngak jeng bruk dui pachreih, karei, oh halei hu dalam khan ao di bangsa nan, lac bruk gheih ghang angaok dom blah pagam kanuai tui gah lakuk raong khan ao, bruk pambuak sambo bar brei mboh yau tanrak hadah alam di tangin ao saong abih di nyu lac nduan ma-om ngak meng hala. Dom asal kadha ini, dalam bruk gap mbiah halei, meda maong yau dom bruk piah krein bruk siam gheih karei di ilamo bhap bini urang bangsa LoLo juk./.