Page harei 25/10 meng blaoh, di Palei Ilamo-Jirah rivang dom bangsa Viet Nam (xa Đoài Phương, Ha Noi), tuai damuai hu bingun piah duah thau Tet Raya Aidil Fitri di bangsa Cam Islam tinh An Giang tapa bruk pamedeih dom adat, adat cambat tanarakun saong bruk gheih ilamo hu bhap bini khik ramik tapa dom rai rah menuac urang.

Tet Raya Aidil Fitri lac adat hu makna dalam raidiuk daok dang di bangsa Cam Islam An Giang. Tui saka Islam, bilan Ramadan rah tabiak meng harei 1/9 tal 30/9, patui veik lac Tet Raya Aidil Fitri meng harei 1/10 tal 3/10. Dalam bilan Ramadan, urang tui Islam ein mbang, ein menyum meng tuk ia harei tagok tal ia harei trun, khik ramik sap ndom panuac puac, bruk ngak, solat sampahyang saong pasram padhih tui adat aguma. Tet Raya lac tukvak brei mboh dom urang tui aguma tamat blaoh 1 bilan ngak catang dom adat aguma.

Dalam labik baoh sang Cam Islam di Palei Ilamo-Jirah rivang dom bangsa Viet Nam, tuai damuai duah thau raidiuk di 1 baoh sang dalam dom harei puac bilan Ramadan. Tuk langik daok oh ka hadah, amaik srap gap var mbang Suhoor, ame ieu dom anek medeih. Baoh sang daok vil taom dan gauk mbang huak dahlau tuk ein eik. Tuk ia harei tagok, lac tuk ein eik hu ngak, yaok urang hu ngak bruk yaok harei. Tal biar harei sup, hadei sa harei ein mbang, grauk urang daok haong gauk haong var huak Iftar-var mbang hadei 1 harei ein eik, gam huak mbang, klah rabha ka dom asal kadha dalam harei. Bruk daok dang yau nan rah tabiak dalam 1 bilan Ramadan.

Tui adat di bhap bini Cam Islam An Giang, di harei 29 di bilan Ramadan, dom halau janeing saong urang hu angan je maong ia bulan meda piah thau ka tukvak raok Tet Raya Aidil Fitri. Meyah ia bulan meda rah tabiak, harei hadei brei tame Tet Raya. Meyah oh ka mboh ia bulan meda, bhap bini ein eik veik 1 harei, tal abih harei ka 30 saong hadei harei 30 lac harei Tet Raya.

Hadei tuk thau ka hareu Tet Raya Aidil Fitri, dom halau janeing pathau khan tal baoh sang meng sap hagar bhap bini. Dalam var page akaok meti di harei Raya, urang Cam cuk dom khan ao biak gheih. Likei mai sang megik ngak dom adat sampahyang, likau ka salamat ka baoh sang, bhap bini saong dom rahra anit ranam.

Di sang megik, bruk sambai harei Raya biak hu ngak praong prang. Dom urang tui aguma dak talei tapak gauk, srap gap ngak adat. 2 urang akaok ngak adat lac ong Inam saong Khotib yam tame labik pasak. Ong Inam dang ngak adat sampahyang, ong Khotib puac kadha adat aguma saong hu makna ginreih di harei Raya, ghak kakei dom urang thau ma-af dom bruk chung di gauk, daok thau anit ranam saong ngak dom bruk siam gheih dalam raidiuk yaok harei.

Hadei var ngak adat di sang magik, grauk urang gilac mai sang, daok taphia salao lisei haong dom kaya mbang, salao ahar bhap bini saong cà ri ndung bak pahe bangi di kaya mbang bangsa Cam.

Bruk gheih karei dalam 3 harei Tet Raya di bhap bini bangsa Cam Islam An Giang lac adat peih ngak likhah. Dom diuk pasang dalam bingun ini ngak ka harei Tet hu chreih sambai jang. Bruk bui sambai di dom baoh sang jeng pambak tabiak tal but pajaih, kak kajap uranam bhap bini.

Tapa rilo rai rah, urang Cam Islam jeng khik ramik saong pato veik adat cambat dalam raidiuk yaok harei. Yaok bilan Raya lac bingun piah dom rai rah kakei ka gauk hadar ka halau agha, hatai je, anit ranam gauk saong bruk thau khik ramik ilamo di mukkei caik rai./.