Patui danak dak Mbang nyaom ka 9, Quoc hoi mbang XV, page ini 22/5, Akok Mentri Pato megru Nguyễn Kim Sơn taduan ngak tui tacei ba di Thu tuong Rajaei puac harak du thao Sarak di Quoc hoi ka bruk pato pakai mam non ka uranaih  mau giao umo meng 3 tal 5 thun. Asar kadha ini di du thao ndem ka bruk pambak praong pato bac ka uranaih umo meng 3 tal 5 thun, ngan haong uranaih umo meng 3 tal 5 thun  dalam dom sang bac mam non. Sarak brei ngak dahlau bruk pato bac ka mam non bhum ceik, bhum urang bangsa takik, bhum kaoh pulao, bhum taphia negar, bhum tapen tasik, bhum bruk ngak mbang - raidiuk kan kathaot, biak kathaot, labik khu cong nghiep, labik che xuat.

Page ini 22/5, Lien Doan Lao dong Ban Can Tho meyaom 50 kapol nyaom saong urang naih gheih. Urak ini, Ban Can Tho hu 1.202 Cong ndoan pakat co so, ngan haong labaih 90 ribau urang. Dom thun tapa, Cong doan dom pakat peih ngak rilo bruk hu makna biak lagaih ka urang ndoan, urang ngak. Urang dang akaok UB bhap bini Ban Can Tho caong khin tukvak anak tal dom pakat Cong ndoan brei salih birau kati catang jalan sahaneng pakacah gauk piah pachreih hu rilo urang ndoan, urang ngak bruk. 

Tong cuc Hai quan Trung Quoc hu mbaok harak brei veik 829 ma so bhum taneh pala saong 131 ma so labik papaok baoh durian di Viet Nam. Yau nan min, mbiah tal ini Viet Nam hu abih tih 1.469 labik pala saong 188 labik papaok baoh durian pablei tapa negar Trung Quoc. Ini lac bruk lagaih piah Viet Nam patagok bruk pablei baoh durian tame darak pasar Trung Quoc, abih di nyu nan lac tuk daok tame bilan paik baoh di dom tinh bhum taneh gah ia harei tame saong anak tal lac bhum Tay Nguyen.

Meng akaok thun mbiah tal harei 16 bilan 5, Ban raya HCM hu 51 urang njom COVID-19, yau nan min, kreh bilan 4 mbiah tal ini, dom urang ruak COVID-19, parilo yaok adit. Anak jit ruak COVID-19, So Y te ban raya tacei ba jalan samar peih ngak dom bruk pacang, caga; ngak siam bruk taduan urang ruak, taong ruak, iek glang, jru ruak ka urang njom COVID-19, samar thau urang jaik ruak trak, langyah sumu, takik abih ba tal metai. Dom sang iek ruak tui iek bruk rao hacih tangin, cuk tanjiak pacang mbaok ngan haong urang tame saong tabiak sang iek ruak.   

Tui Jabat kuhria langik tasik Meraong negar saong Tay Nguyen, langik tasik di TPHCM saong Meraong negar dalam dom harei anak tal meda sraw kadau, bhian hu hajan praong. Hajan praong dui atah tal abih harei 27.5. Kuhria bih tih ia hajan meng 100 – 250 mm, hu labik labaih 250 mm. Hajan gam hangin rah tabiak di labik meraong Tasik Bien Dong, yau nan ye gilai taong chap ikan labik ini meda gaok hangin khang riyak paoh. 

Pandiak catang daok me-om tagok rilo labik di bhum chau A, yaom lac thun ini meda lahei la-ar jang kayua langik La Nina. Meng Pakistan, Ấn Độ, Bangladesh tal Trung Quốc, Hàn Quốc, di ralo ban raya langik pandiak tagok tal 40oC, ngak kan kandah ka gah y te, ngak kan kandah tal bruk ndih daok saong prein yawa bhap bini.

Tong thong Philippines Ferdinand Marcos caong khin taong abih dom urang akaok mentri payua harak don likau padeih bruk, nan lac sa bruk hu pagap lac “padang veik biak kiti catang” brei adat ka ong salih birau rajaei piah hu rilo jang  njauk hatai caong khin di bhap bini rahra. Bruk ba tabiak taong abih gah labaih sa adit palih ruah kreh vaktu hu pagap yau sa bruk duah thau hatai caong khin di bhap bini ka bruk tacei ba di Tong thong Marcos, min bruk nan oh yau hatai caong khin.

Hadei rilo jalan ngak drah samar, dalam nan hu bruk ba ralo brah tame darak pasar min oh khik hu tani tanat yaom brah, Rajaei Nhat Ban sanya brei ngak tui rilo bruk piah yaom brah hu trun. Urak ini, yaom brah di Nhat Ban meng labaih 2.000 yen/ 5 kilo brah tagok tal 4.500 yen. Thu tuong  Ishiba brei padeih bruk mek brah tabiak meng gilang khik piah di negar./.