Rajaei birau patabiak Sarak ka bruk daong  jien pasiam veik hadei jit ruak rah tabiak di athur raong. Sarak ndem cambaic laic, karja daong meneing jien khat lahik kayua athur njauk jit ruak, oh bayar jien khat lahik. Jien daong ngan haong labik raong glang athur, manuk ada meng 20.000 đồng sa kilo tal 55.000 đồng sa kilo. Ngan haong labik raong, ngak tabiak kaya dalam ia, jien daong meng 10.000 đồng sa drei tal 50 trieu dong sa hecta…Langiu di nan, urang hu mbaok tame ngak pasiam hadei jit ruak athur raong saong hu mbaok tame pacang caga jit ruak jeng hu daong jien.

Mbiah tal ini, dalam negar kuhria hu 21 dalam 63 bhum palei oh daok baoh sang halei taik tahak. Njauk caik hatai, dalam adit tapa hu veik tinh An Giang ngak blaoh bruk oh daok baoh sang taik tahak. Ong Trần Minh Nhựt, Yam ndoc Sở Ngak nong saong Moi truong An Giang brei mboh, piah ngak hu bruk ini, dalam piah bruk peih ngak brei abih baoh sang oh daok taik tahak, dom bhum palei jak ba jak ba dom urang padang ngak sang pahala piah daong padang ngak sang piah trun takik jien ka bhap bini saong padang ngak sang khang kajap jang. Tui nan, jak ba dom gah agama, bhap bini, but pajaih daong jien saong harei ngak bruk, pandap ngak sang…

Peih bruk jak ba “Bhap bini bac pasram pandar taka so”, tinh Cà Mau peih rilo bruk pasram, pathau  khan, pambak praong, paglong ilamo pandar taka so siam mekre, khik kandauk khaw tin saong plaik njiak bruk pachot pagat angaok mang. Abih di nyu, tinh Ca Mau padang danak dak halan hatian, padang kapol xung kich, peih buk “Bhap bini bac pasram pandar taka so” piah pato saong daong urang kathaot, bol bhap bangsa takik, bhum atah bayah hu pandar jitvu taka so; peih dom tal bac taka so piah paglong bruk thau pandar taka so ka bhap bini…  

Peih bruk ngak tui jalan tacei pato di Mentri Kong an, di 4 tinh Trà Vinh,  Đồng Tháp, Vĩnh Long saong Tiền Giang gah chuc nang brei sumu  gauk peih bruk pasang  dom ghe gilac  njuk mek cuah saong pajeng cuah, patau radaih angaok kraong piah pacang cakak bruk kuac mek cuah radaih suan hukum. Dalam nan brei kuhria iek veik abih bruk tut angan pasang iek gilai kapal, kuac mek pajeng ba cuah, pablei xang menyek, pajeng ba tuai damuai saong pacang caga kol duis ngak suan hukum jalan ia.

Meng akaok thun mbiah tal ini, kapol urang ngak nong pakat tinh Dong Nai peih bruk pathau khan, jak ba urang jakar, urang hoi, urang ngak nong pachreih bruk Jak ba Dalam negar  daong gauk padang ngak palei pala birau. Bruk jak ba Taong abih gauk dalam negar daong prein padang palei pala birau, ilamo siam gheih. Urak ini urang ngak nong rik daong hu jaik 7 ti 400 trieu dong, labaih 2 ribau 500 harei ngak bruk, 1,5 ribau met khoi taneh, randaih patau piah pasiam, ngak birau jalan palei pala, jalan ribong saong pagam jalan gom menyek truac hadah…

 Tong thong  Hàn Quốc Lee Jae-myung iew brei hu jalan khik tani tanat yaom kaom, dalam tuk jien car pandar tagok rilo daok ngak ba tal “dom bruk pandik pandua”. Yaom ralaow manuk saong baoh manuk tagok glong kuhria meng tuk jit ruak manuk ada rah tabiak di Brazil. Rajaei Hàn Quoc brei takik blei ralaow manuk mai meng dom labik hu jit ruak manuk ada di  Brazil. Rajaei Han Quoc  kuhria peih tabiak sa jaman birau peih praong jien padai piah jhul pasamar brei daong jien mbaok saong daong kein lagaih, daong patagok kinh te.

Yaok ribau urang agama Islam nao rukun Haji di Sang megik Islam  praong abih di Bhum taneh po Nabi Mecca - Saudi Arabia piah ngak tui adat Tawaf saong Masaa, tamat bruk nao Haji yaok thun. Ngan haong rilo urang tui agama Islam, ini lac tabung glong di bruk ngak rukun saong pasang iek rup drei.Thun ini, karja Saudi Arabia peih ngak rilo jalan khik brei salamat saong bruk daong ka urang nao Haji hu salamad jang dalam tuk cuah liga pandiak yau dahlah apui.

Pandiak catang me-om tagok bak bhum Barak An Do, pandiak tapa 43 do C di rilo labik ngak jhak tal prein yawa di bhap bini. Bhap bini duah mai dom labik cambuis ia dalam bhum palei jeng yau labik pablei ia menyum ngak la-ar dalam rup. An Do bhian rah tabiak bilan he langik biak pandiak kayua daok dalam bhum langik pandiak dui atah dahlau tuk tame bilan hajan. Yau nan min, dom mbang langik padiak rah tabiak dak thun dak catang jang./.