Sang ong Nguyễn Hữu Ánh (bhian hu ieu lac Bảy Ánh, daok di puk 3, xã Tân Thành, TP.Cà Mau) bahrau kuac mek sa baoh danao raong ikan jing, pablei hu labaih 700 triệu đồng, jien laba hu labaih 450 triệu. Meng akaok thun tal ini, diuk pasang di ong Bảy kuac mek hu labaih yaok piluh danao raong ikan. Ong Bảy khan lac, thun 1999 di tỉnh Cà Mau tuk ka oh thei raong ikan jing. Tapa urang krein randap yaih khan, ong thau tal saong hu hatai caong cak rok bruk ngak ini. Hadiuk di ong pacang cakak ong, kanda huac lac raong hu jak jeng ha oh, blaoh huac oh thau pablei ka thei? Ong Bảy pang mboh jeng njauk min tapi hatai jeng kham marat raong, duah yaok jalan piah ngak, naih dan diuk oh hu, tal tuk diuk di ong ginaong blaoh ndem mayai lac: “ thei ngak hagait thei ngak”. Ong Bảy Ánh jeng khin ngak biak, pablei labaih 100 jak padai, lac abih dạtih drap ar di sang piah blei pajaih ikan raong:

"Tuk bahrau raong ikan dahlak biak duh hatai ka jalan pablei tabiak min tapi ye tuk raong dahlak oh gaok kan kandah hagait. Dahlak blei 20 ký kilo ikan pajaih tuk nan hu yaom 3,5 triệu, samu duo labaih 100 jak padai. Dahlak raong janih ikan 20 drei sa kilo g, njauk 18 bilan ye dahlak pablei, mek hu kein laba biak glaong. Pablei hu 65 triệu, ameh meng nan hu yaom 1,8 triệu sa mbaik min".

Buh tabiak sa min mek laba hu ralo jaik 20 mbang, diuk pasang urang ngak nong raong ikan jing camriep di Cà Mau biak drut drui, uan tabuan. “Mbang ngak jak jeng bui sambai daoh mayah oh ngak jak jeng cei tagok ceik Tà Lơn daok paje”, ong Bảy ndem mayai klao min biak hadah mbaok mata kayua khin oh hatai diuk.

Urang ngak nong angan Bảy Ánh daok raong ikan jing pablak gam haong raong ikan padaok bống tượng di danao praong 6,5 ha, hu 42 danao. Ong raong gam gam pauak gauk, tuk halei jeng hu dom danao: papam pajaih ikan; ikan raong; ikan pablei pa uak gauk oh padeih. Daong hu jien mek tame yaok mbang. Khan brei thau ka jalan raong hu jak jeng, ong Bảy biak khang hatai ndem lac, ikan jing caong hu raong dalam ia taba, raong pagap, mbaih; daok gilac veik lac drei tari tareng salih danao ka ikan meda raong hu jak jeng:

"Dahlak raong meng nan mai tal urak ini mboh biak takik gaok ruak kik. Tuk raong, ikan palao trun sa danao min, raong hu labaih meng 7 tal 8 bilan ye peih bruk ba ikan tagok, parabha tabiak saong palao tabiak rilo danao praong tui praong, drei sit tui sit. Raong tal labaih 14 bilan blaoh salih danao sa mbang tra. Yaok mbang raong yau nan salih danao ka ikan 3 mbang. Tok caong salih danao ka dahlak min, blaoh pandar mek men tiêu hóa, oh pandar jru hagait. Drei ba pandap mbang trun ka ikan mbang min, tukvak masa meng 7 tal 8 bilan ye peih bruk salih danao raong".

 Meng jak jeng di sang ong Bảy Ánh, rilo urang di ini jeng bac ngak tui, cak rok bruk raong ikan jing, ikan gadaok. Dak harei dak tamuh tabiak bruk raong ikan jing di xã Tân Thành hu rilo urang mai duah thau piah bac ngak tui. Ong Trần Quốc Trạng, Akaok Kapul Urang ngak nong xã Tân Thành brei thau:

"Rahra di ini biak takre haong bruk raong ikan jing, ini lac bruk ngak rilo abih di bhum palei. Urak ini, mblang danao raong ikan jing, ikan bống tượng dalam xa lac labaih 250 ha, hu labaih 420 sang raong. Yaom ikan jing, ikan bống tượng daok biak glaong dut saong dom thun blaoh. Rahra di ini raong hu laba glaong, raong ikan jing di mangaok danao praong 1ha mek hu laba 1,5 tấn, jien mek tame labaih 700 triệu đồng".

Ong Nguyễn Hữu Ánh tal urak ini jeng brei thau lac, meng tuk eng drei cak rok bruk raong ikan jing lac “khin ngak piah mbang rilo”. Diuk ong pacang cakak min ong raong jeng njauk. Mayah pang diuk yau meng dalau ye sang ong oh hu harei ini. Di kreih bilan 10 bahrau blaoh, ong hu taduan Harak pok mayaom di pakat nagar Kapul urang ngak nong. Ini ieu lac sa dalam biak rilo Harak pok mayaom bo urang ngak nong hu alin taduan mek.  “Patao ikan jing” tok duh hatai lac bruk sahaneng tal taneh raong ikan ieu lac taneh ngak padai min salih tapa raong ikan lavik paje, ka oh thau harei hadei nyu yau habar?./.