Langiu di bruk ngak mbang dalam tasik, njei danui rong nho daok hu dom baoh sang, dom labik ngak di tinh Ninh Thuan palao raong rilo di dom danao, dom labik binek tapen tasik.

Jien buh tame tuk camriep bier, tukik, njei danui nyu tamuh drah samar saong brei laba glaong, janih njei danui rong nho pakat glaong ini peih tabiak rilo kein lagaih bahrau, ngak brei parilo jalan ngak mbang saong paglaong jien mek tame ka rahra di ini.

Xã Cà Ná, huyen Thuận Nam hu dom baoh danao hu blaoh praong rah tui tapen tasik, hu ia tasik hacih mbak gap tani tanat, brei kein lagaih piah ka rong nho njei danui tamuh cak rok saong praong tagok siam. Kayua yau nan ye, bruk raong rong nho njei danui hu ba jien mek tame biak rilo ka rilo urang di bhum palei.

Ong Võ Văn Thuận daok di xa Cà Ná brei thau lac, meng jam tuk 7 masup page ong gam haong dom urang taong mek ikan tabiak danao hu ia tasik di dom labik ngak sara piah paik mek rong nho njei danui. Pandap caong piah mek yau urang kriuk nhái, tamin piah caluai tram dalam ia saong raok nding piah palao suak yava, urang caluai trun ia dalam meng 1,5 tal 2m piah paik dom dhar njei danui rong nho brei tame kadung halam. Yaok harei, ong Thuận paik mek hu labaih meng 20 tal 30kg njei danui rong nho, pablei ngan haong yaom tui kuhria meng 25.000-30.000 đồng/kg, brei jien mek tame labaih 500.000 đồng sa harei. Pandap njei danui rong nho that urak ini hu yaom pablei meng 45.000-65.000 dong/kg, daok rong nho neh mek ia tabiak hu yaom meng 120.000-180.000 dong/kg. 

Piah tani tanat ka gah pabak pandap njei danui rong nho ka darak pasar, rilo baoh sang, labik ngak di Ninh Thuan hu cak rok bruk raong njei danui rong nho hu peih praong bruk ngak tui jalan pambuak gauk ngak.

Ngan haong rilo thun ngak bruk dalam gah pala raong njei danui rong nho, Ong Trần Ngọc Thương, Yam ndok Công ty TNHH Rong nho Ngọc Thương, brei thau lac phun njei danui rong nho biak mbuan si raong, nyu caong hu ia hacih saong ganap mbak brei ka tani tanat meng 28-35‰ dom danao daok klak balaua tau daok  saoh meda brei pasiam piah raong njei danui rong nho. Piah mek hu kein lagaih praong glaong jang njauk pabam labaih 2 tấn rong nho pajaih brei ka 1.000m2, bruk tam pabam brei ganap lapih meda ngak ka labik raong njei danui rong nho cak rok tagok siam, urak ini yaom pablei kuhria meng 7.000-10.000 đồng/kg. Masa hadei labaih 60 harei meng tuk palaik pajaih, rong nho njei danui meda atah paik mek hu saong meda raong gam gam. Bruk njauk caik hatai nan ieu lac rong nho oh  janih ba mai kein laba glaong blaoh daok hu prein ngak pasiam ia di labik raong.

Ong Lê Xuân Trọng, Phaok Akaok UB Bhap bini xa Cà Ná, huyen Thuận Nam, brei thau lac pala njei danui rong nho ieu lac bruk ngak bahrau piah cak rok bruk ngak mbang, duah jien, rahra gam eng drei palao raong gam pandar hu mblang taneh danao di dalam bhum palei. Tukvak masa anak tal, meda likau dom jabat kanja hu sarak daong ba piah peih praong bruk pala rong nho njei danui dak harei dak patagok jang, rik tame bruk patagok kinh te – xa hoi di bhum palei.

Urak ini, bruk pala raong njei danui rong nho daok hu dom bhum palei tapen tasik di dom huyen Thuận Nam, huyen Ninh Hải cak rok patagok. Rong nho njei danui ieu lac janih pandap mbang hu rilo siam ka rup pabhap meda pabak, salih ka njam hijao.

Pandap rong nho meda ngak tabiak jeng njei danui that, njei danui thu, njei danui tut ia lange, njei danui tapung, janih tawa ngak mbangang meng njei danui. Rong nho njei danui hu gam rilo janih protein, canxi, magie, kali, natri. Dalam nan hu iốt, pasei, vitamin A, pacang caga ruak lavang lavaih, kurang darah.

Rong nho hu darak pasa dom taneh ia yau ye Japon, Han Quoc, Trung Quoc, Malaysia… biak takre nyu./.