Alăng Lợi lâng Aviết Sĩ hơnh deh dha nuôr lâng pr’zơc tươc lâng t’ruih pa xul p’rá Cơ Tu âng Đài P’rá Việt Nam. T’ruih pa xul coh sóng FM, tấn số 97 Mhz lâng sóng AM tần số 594Khz.

 Đha nuôr lâng pr’zơc da dêr! Năc đhêêng 1 t’ngay hơớ ahêê vêy dzang moot c’moo t’mêê 2022. C’moo 2021, n’đhơ ăt zâng lâng bâc râu zr’năh k’đhap tu pr’luh cr’ay Covid-19 lâng boo đhí tuh bhlong, n’đhang k’tiêc k’ruung hêê công dzợ bơơn bâc bh’nơơn đhị apêê bh’rợ kinh tế, xã hội, an ninh quốc phòng. Đha nuôr prang k’tiêc xooc ra văng hơnh deh 1 c’moo t’mêê cơnh lâng bâc râu bhui har lâng p’rơơm!

# Đha nuôr lâng pr’zơc xooc xơợng pr’hat “ Khúc giao mùa” âng nhạc sĩ Huy Tuấn xră, ca sĩ Mỹ Linh – Minh Quân hat.

# Đha nuôr xooc xơợng t’ruih pa xul p’rá Cơ Tu t’ngay x’ría âng c’moo 2021. T’ruih âng Cơ quan TTKV niền Trung- Đài P’rá Việt Nam bhrợ têng.

Tr’nơơp t’ruih, đha nuôr lâng pr’zơc đh’rưah lâng zi xay truih 10 bh’rợ xa nay ga măc chr’năp coh cr’loọng k’tiêc lâng 10 bh’rợ xa nay ga măc chr’năp coh bha lang k’tiêc âng Đài P’rá Việt Nam chơơih pay.

# T’mêê năc ki năc đợ bh’rợ xa nay ga măc chr’năp coh cr’loọng k’tiêc lâng bha lang k’tiêc coh c’moo 2021 âng Đài P’rá Việt Nam chơơih pay. Đha nuôr lâng pr’zơc đương xơợng cớ t’ruih pa xul p’rá Cơ Tu âng Đài P’rá Việt Nam.

Đha nuôr lâng pr’zơc da dêr! C’moo 2021, pr’luh Covid-19 dưr vaih cớ cơnh lâng biến chủng t’mêê cr’đơơng tươc zâp râu tươc pa dưr tr’mông tr’meh pr’ăt tr’nơt âng k’tiêc k’ruung hêê. Đhị zr’năh k’đhap căh bool tơợ a hay, Đảng lâng Nhà nước âi vêy bâc chính sách loon đơơh đoọng k’đhơợng xay bhrợ têng cr’noọ tâm proó “k’zệ pr’luh cr’ay lâng pa dưr tr’mông tr’meh” đh’rưah lâng apêê c’lâng bh’rợ choom ăt ma mông yêm têêm, bhriêl g’lăng, ch’mêêt lêy liêm choom pr’luh cr’ay.

# Đươi cơnh đêêc, bâc c’xêê x’ría c’moo 2021, apêê doanh nghiệp, pr’loọng tr’câl lâng apêê tổ chức kinh tế âi z’lâh apêê zr’năh k’đhap, bhrợ t’vaih ta la tranh tr’mông tr’meh cơnh lâng đợ pr’hoọm tr’ang. Zr’lụ doanh nghiệp âi ma năl chơơc lêy thị trường đươi dua bh’nơơn. Muy bơr  ngành công nghiệp bha lâng lâng bh’nơơn công nghiệp bha lâng zêng vêy mơ dzooc dal.

#K’tiêc k’ruung n’lơơng k’rong bhrợ ooy Việt Nam công năc râu liêm choom âng pr’đơợ tr’mông tr’meh k’tiêc k’ruung coh c’moo 2021. N’đhơ quý 3/2021, pr’đơợ tr’mông zr’năh k’đhap tu pr’luh cr’ay Covid-19 n’đhang coh c’moo 2021 zên k’rong bhrợ âng k’tiêc k’ruung n’lơơng xay moon bơơn lâh 29 tỷ đô la Mỹ.

#Coh pr’đơợ pr’luh cr’ay bhrợ tr’toot c’bhuh đơơng âng, bâc doanh nghiệp bhrợ têng pr’đươi pa câl ooy k’tiêc k’ruung n’lơơng lum zr’năh k’đhap ooy pr’đươi  đươi dua tơơp moot bhrợ, thị trường đươi dua, zên đơơng âng dal, n’đhang kim ngach tr’câl tr’bhlêy lâng k’tiêc k’ruung n’lơơng c’moo 2021 bơơn lâh 660 tỷ Đô la Mỹ, coh đêêc xuất siêu bơơn 2,1 tỷ đô la Mỹ đơơng âng Việt Nam dưr vaih k’tiêc k’ruung xuất siêu ta luôn coh 6 c’moo.

#Cơnh lâng râu liêm choom ooy bhrợ têng, k’rong bhrợ lâng tr’câl  tr’bhlêy bha lang k’tiêc coh apêê c’xêê x’ría c’moo 2021 đoọng lêy, pr’đơợ tr’mông tr’meh k’tiêc k’ruung xooc tr’xin bhrợ pa dưr. Tr’mông tr’meh quý 4/2021 dzooc tơợ 2-3% t’piing lâng cr’chăl đâu c’moo 2020 lâng GDP prang c’moo 2021 dzooc 2,58%. Nâu đoo năc pr’đơợ chr’năp đoọng tr’mông tr’meh Việt Nam bhrợ pa dưr cớ coh c’moo 2022.

#Ớ, đha nuôr lâng pr’zơc da dêr! Cơnh lâng đợ râu liêm choom âng zi t’mêê xay truih năc ki, a hêê vêy choom p’rơơm ooy rau pa dưr cớ, dưr k’rơ âng pr’đơợ tr’mông tr’meh Việt Nam coh c’moo 2022. Vêy bơơn đợ bh’nơơn n’nâu, Trung ương Đảng, Chính phủ, Thủ tướng Chính phủ âi vêy bâc c’lâng xa nay, chính sách đoọng n’jưah ch’mêêt lêy liêm choom pr’luh cr’ay Covid-19 n’jưah pa dưr tr’mông tr’meh prăt tr’nơt. Nâu câi, đha nuôr lâng pr’zơc dhd’rưah lêy cớ g’luh pr’luh g’luh 4 lâng apêê c’lâng bh’rợ tơợ Trung ương tươc vel đong đoọng xơợng bhrợ cr’noọ xa nay coh zêl pr’luh “ đơc c’rơ tr’mung âng đha nuôr l’lăm bhlâng.”