Ta ăp xã n’har bri neh kơh Ia Rvê, Ea Bung, Buôn Đôn n’hanh Ia Lốp, n’gor Dak Lak, cán bộ tâm dâng, bu ranh ƀon, nuĭh geh nsing nơm, cán bộ thôn, ƀon n’hanh mpôl Tahen n’har bri rƀah gĭt nău lư mpeh nău lư tâm boh dak bah dih, ƀư tơm neh dak, rnă njrăng n’har bri neh dak; nkre năp gĭt blău nkoch trêng nău lư n’hanh rnă njrăng mạng.

Ăp nuĭh ƀư nău kan mbơh nău lư ntĭm nti nău blău mbơh nău lư, rgum nchih uĕh di ndơ nkoch trêng nău lư; gĭt năl, nkra lơh nău lư tih, nklă ta trôm mạng. Nău dŏng trí tuệ nhân tạo n’hanh công nghệ mbrô dơi nkoch mbơh, kơl mpôl kan nkoch trêng nău lư tâm dâng lor nchrăp dơn nău lư n’hanh nđơn nkoch trêng tay nău lư.

Yuh Nguyễn Thị Thi, ta thôn 4, xã Ea Bung nkoch, ăp nău blău dja mbra ndăn dŏng tâm pah kan nkoch trêng nău lư ta thôn, ƀon.

“Ma tâm nchră, săk gâp nơm wât kloh lơn mpeh nău dơn kan bah ăp nuĭh ƀon lan tâm nău mât rnă njrăng, mât ƀư tơm n’har bri; nkre gĭt trong tât, nkoch nău lư di ngăn n’hanh mô djăt tĭng ăp nău lư mô hŏ gĭt di ngăn ngăn. Jêh aơ tay rnôk sĭt thôn, gâp mbra ndop tâm ăp rơh sinh hoạt chi hội, ăp rơh hop thôn, tâm ôp na nê̆ đah kônh wa n’hanh rgŏ jă hội viên tĭng jăp pháp luật, nsrôih râng mât rnă njrăng, rĭng grep n’hanh ƀư tơm n’har bri.”

Ndrel đah nê, ăp tâm nchră nta trong dơh gay nuĭh ƀon lan nkual n’har bri tât đah tơm nău lư di ngăn mpeh nô nău n’har bri n’hanh ăp trong nchrăp, trong kơl geh tât. Wa Lê Đình Quý, Groi Kruanh UBND xã Ia Rvê, n’gor Dak Lak an gĭt:

“Aơ lah rnôk gay nuĭh ƀon lan tât dơi nău lư di ngăn ngăn, mpeh nô nău n’har bri, tâm boh dêh bên, tâm boh tâm rnglăp đah Việt Nam n’hanh Campuchia tâm ban kơt ăp trong nchrăp, trong kơl geh tât ta n’har bri. Bah nê, nuĭh ƀon lan n’hao nău gĭt wât êng, nău gĭt dơn kan tâm nău mât njrăng ƀư tơm neh dak, nsrôih râng mât đăp mpăn, rdâk njêng tâm rnglăp, dêh bên đah ƀon lan bar ding n’har bri.”

Wa Nguyễn Quốc Hiệp, Groi Giám đốc Sở Văn hóa, Thể thao n’hanh Pâl nđaih n’gor Dak Lak uănh năl, ta mạng dôl jêng du trong way nkoch trêng nău lư mbro bah nuĭh ƀon lan. Yor kơt nê̆, ndrel đah ndu nău lư di ngăn ngăn tât tâm dâng, nău năp gĭt blău năl nău lư tih djơh, nkoch nklă dơi ntrŏng lah du nkô̆ khlay đŏng. Năm aơ, đah nău pơk hvi nuĭh n’hanh trong nkoch trêng, pah kan mbơh nău lư tâm boh dak bah dih dơi nsĭt tât dăch lơn đah cán bộ n’hanh nuĭh ƀon lan ta nkual n’har bri:

“Mpôl hên an ƀư lam hvi tât cán bộ thôn, ƀon, bu ranh ƀon, kruanh bản, rmôt cán bộ, công chức n’gâng tơm tâm dâng, lơn lah nkual n’har bri. Ma tâm nchră, mpôl hên dôl n’hao nău gĭt êng bah cán bộ, lam trong kan chính trị n’hanh nuĭh ƀon lan ta nkual n’har bri; nău lư, nkoch trêng ăp săk geh, dơh uĕh, ăp trong nkra gay mât njrăng ƀư tơm n’har bri tâm ban kơt njrăng, n’gang nău lư tih djơh ta trôm mạng xã hội aƀaơ.”

Nău nsĭt nău lư di ngăn ngăn tât tâm dâng, nkre n’hao nău blău nkra ƀư nău lư an rmôt nkoch trêng, bu ranh ƀon, nuĭh geh nsing nơm n’hanh cán bộ thôn, ƀon dơi mpŏng njêng geh tay du trong buăt nthoi đah n’gâng kan ta ntŭk, mpôl kan dơi kan đah nuĭh ƀon lan. Bah nê, nuĭh ƀon lan nkual n’har bri geh tay ntŭk gay ma wơt dơn, uănh năl di nău lư, n’hao nău gĭt êng nkah njrăng n’hanh lor nchrăp râng mât rnă njrăng, rĭng grep, mât njrăng ƀư tơm neh dak, rdâk njêng trong n’har bri dêh bên, bah tâm lơh tâm su.