Tahen n’har bri n’gor Dak Lak n’hanh Nhih nti Phổ thông nội trú Tiểu học - THCS Ia Lốp mbra kan nsum rlău 5 rmôt nău kan, tâm nê Tahen n’har bri ntik n’hao nău khlay kan ndrel hăn nhih nti tâm trong ntĭm nti pháp luật, nău blău rêh, rƀŏng nău kan, leo ƀư n’hanh mât chăm kon se nti geh nău rêh jêr jŏt.

Dŭt njrăng uănh khlay, ăp bôk nău kan mât chăm kon se nti dơi mât tay, tâm nê geh “Ndơl jâng oh tât nhih nti – Kon mât Pôih n’har bri”, dơn mât bôk kon se ach o, ndơ̆ kơl học bổng, ntop kơl but săm ji, phăt dak si n’hanh rvăt năp, ndơ dŏng nti an kon se nhih nti dân tộc nội trú geh nău rêh jêr jŏt mha êng. Đại tá Rơ Lan Ngân, Groi Chính ủy Ban Chỉ huy Tahen n’har bri n’gor Dak Lak an gĭt, nău tâm njêng nta tay trong tâm n’guăk gay mpôl Tahen n’har bri kan nsum mbro, lhăt đah nhih nti tâm trong ntĭm n’hanh mât chăm kon se nti nkual n’har bri. Bah nê rgop n’hao săk blău ntĭm nti, kơi năp nău gĭt pháp luật, dơn kan mât njrăng ƀư tơm n’har bri n’hanh rdâk njêng ta ntŭk n’har bri nâp dăng.