Bôk nău kan ƀư ta Ngih sam ƀŭt Phổ thông nội trú Tiểu học n'hanh THCS Ia Lốp. Tâm nău nteh n'gŭr răm, ăp oh dơi uănh ƀư njroh mprơ, võ thuật, râng ăp nău ƀư pâl rlưn n'hanh ndrel ƀư sa Trung thu. Rơh bôk năp dơi wơt Trung thu tâm ngih sam ƀŭt mhe, oh Triệu Thị Lan Anh, kon hŏk jrô 7, Ngih sam ƀŭt Phổ thông nội trú Tiểu học n'hanh THCS Ia Lốp rhơn nkoch: "Nar aơ kon dơi pâl trung thu dŭt lah rhơn, kon dơi nti tâm ngih sam ƀŭt mhe, kon saơ dŭt uĕh, ăp băl bah kon dŭt rhơn nđơr đŏng. Kon dăn njuăl nău lah uĕh tât ăp kônh tahen, ăp kônh wa ngai jay n'hanh ăp kônh wa lŏng bôk tôr, ăp oh yuh đoàn viên. Kon mpŏng mbra gơih nti, nti nsơm uĕh".

  Ia Lốp lah xă n'har bri, nău rêh bâh âk rnăk vâl kon hŏk hôm e jêr jŏt. Năm nti aơ, nai n'hanh kon hŏk ngih nti Phổ thông nội trú Tiểu học n'hanh THCS Ia Lốp geh tay nău rhơn rnôk ngih nti mhe geh ntuh kơl rdâk njêng, ndơ̆ lăp dŏng. Nai Phạm Duy Tĩnh, Hiệu trưởng ngih nti an gĭt, rơh trung thu năm aơ 862 kon hoc bâh ngih nti geh dơn ndơ n'hanh vơt "Măng bŏng khay" rhơn m’ak, ueh răm. "Aơ lah du nău dŭt lah rhơn, mô knŭng đah nai, nai nti ma đah lĕ rngôch ăp oh kon hŏk tâm ban kơt rnăk wâl ăp oh kon hŏk ta aơ đŏng. Nar aơ lĕ geh ƀư bôk nău kan trung thu aơ ri dŭt lah ueh geh nkô̆ nău. 20 năm aơ lah bôk nău kan têh ngăn n'hanh lŏ lah bôk năp bâh ngih nti xă Ia Lốp".

 Ta bôk nău kan, Mpôl rdâk ƀư lĕ an 10 nău kan joi nău rêh, 10 ndeh wah jâng, 10 nklâm prăk kơl hăn nti ndrel 890 nklâm ndơ an nuĭh ƀon lan n'hanh kon hŏk xă Ia Lốp; nkre an sam ƀŭt rnê rhơn ăp oh geh nău dơi tâm bôk nău kan "Ndơ̆ jâng oh tât ngih sam ƀŭt".

Êng săk Bí thư n'gor ủy Dak Lak Lương Nguyễn Minh Triết lĕ pă 10 nklâm prăk kơl an kon se nti rlet nău jêr jŏt ndrel 100 rkeh prăk kơl an ndâk ngih gŭ ân du rnăk rnoi mpôl đê̆ geh nău rêh jêr jŏt.

Đại tá Đỗ Quang Thấm, Chính uỷ Rnâng kan rđau tahen Pôih tahen n’harr bri n'gor Dak Lak lah rjăp, aơ lah nău kan ngăn ndrel geh nău khlay rƀŏng tât nkuăl n'har bri, njêng nău ueh răm ân ăp kon se tâm nkuăl n'har bri di rnôk Tết Trung thu. "Aơ lah du nău kan dŭt ngăn ngên n'hanh geh nkô̆ khlay mpơl nău rŏng, nău uănh khlay mha êng bah ăp gưl, ăp n'gâng kan n'hanh bah mpôl tahen n'har bri đah ăp kon se jê̆ n'hanh kon se jê̆ ta nkual n'har bri. Tă bah bôk nău kan aơ ri kơl an ăp kon se geh nău nsing nơm tâm nău uănh khlay mha êng bah ăp gưl, ăp n'gâng kan gay nsrôih kơt nti uĕh lơn tay gay jêng ăp nuĭh ƀon lan geh nău uĕh n'hanh ndrel đah Mpôl tahen n'har bri mât njrăng nâp nâl n'har bri bah neh dak".