Me mbŏ khĭt mô êng lah nau khuch bah êng săk oh, ma hôm lah nau khuch bah rnăk vâl, băl mpôl. Oh Võ Thị Ngọc Ngân, kon se nti Ngih săm ƀŭt THPT Bà Điển, nkuăl ƀon têh Hồ Chí Minh, nkoch:

            ‘Ntơm nar mbŏ gâp khĭt, nau rêh bah rnăk vâl mâp âk nau ntul rlong lơn, rnôk ma ăp mbăk jâk mpeh nau kan văng sa ri kŏ ntŭn tâm n’hâm soan bah mê dơm. Bol ma moh nau kan têh, jê̆ ndrel prăk rêl mô geh tâm ban, yơn me gâp hôm nsôih lôch n’hâm gay ma oh kon nơm dơi geh hăn nti tay nsum ma ăp băl êng êng”.

            Lam dak rnôk aơ geh nklăp 1,5 rkeh kon se geh nau rêh jêr jŏt, tâm nê geh nklăp 176 rbăn kon se rêh kon đơi, kon se geh bu nchlơi êng. Âk nau ntrŭnh, bôk nau kan kơl an hŏ geh ƀư gay ma mât đăp mpăn ân nau rêh kon se kon đơi, kon se bu nchlơi geh hun hao ndrel geh rnglăp ueh lơn, kơt: Nau tâm ton bah lam ntur neh mpeh nau dơi kon se, Luật kon se, Bôk nau kan bah neh dak yor kon se lvang năm 2021-2030; Nau ntrŭnh pháp luật mpeh kon se geh nau rêh jêr jot mha êng.

            Rnôk aơ, tâm lam dak dôl ƀư nau kan kơl an prăk ăp khay ân 21 rbăn kon se rêh kon đơi. Êp nê, Đảng ndrel Ngih dak hŏ ntrŭnh nau kơl an, bonh đă ăp ntŭk kan, êng nŭih, ntŭk kan tăch rgâl tâm ndrel bah dih dak ndrel nsum ty, rgop n’hâm mât chăm kơl an kon se rêh kon đơi lah êng, kon se geh nau rêh jêr jŏt mha êng lah nsum.

            Bah nê hŏ mât chăm kơl an nau rêh bah kon se rêh kon đơi, kon se geh by nchlơi êng, pơk trong ân nau tâm ban, tŏng dơi nau ueh lơn nau geh jêng, tâm di pháp luật, bonh đă ăp kon se gơih n’or lơn tâm nau dơi hun hao, tâm rnglăp ma ntŭk rêh jêng. Wa Nguyễn Văn Lực, Kruanh rmôt kơl an nŭih rven rvo bah n’gor Lâm Đồng, nkoch:

            ‘Tâm Lâm Đồng geh rlau 4000 kon se rêh kon đơi ân geh mât chăm. Ăp khay phung hên kơl an 400 kon se, du hê geh du rkeh prăk, du năm kơt nê lah 4 rmen 800 rkeh. Ndrel tâm ăp bôk năm nti mhe nê, phung hên ƀư nau bonh đă ăp oh nur tâm rgop kan hên tâm rgop kơl, mô hăn dăn kơl, gay mât chăm ân 20 kon se rêh kon đơi lŏ geh hăn nti Đại học ndrel ăp kon se kŏ geh kơl an 200 rkeh prăk gay đăp mpăn ân 4 năm nti. Ndrel mhâm ƀư gay ăp kon se nê gơih, ŭch n’or tâm nau rêh, nsôih hao jêng, mô knŭng tâm rnglăp tâm ƀon lan ma jêh aơ hôm rgop ân nau rêh jêng”.

            Wa Ngô Sách Thực, Kruanh rmôt kơl an nŭih rven rvo Việt Nam mbơh: Đah nau nsum ty bah ăp rmôt kan, ntŭk ƀư nau kan tăch rgâl, nŭih geh nuih n’hâm lŏng ndrel nsum mpôl nau rêh jêng, tâm 5 năm ma aơ, ăp gưl kan, hŏ bonh đă rgop geh rlau 637 rmen prăk gay pă prăk, ndeh vah jâng, ndơ dŏng nti...mât chăm ân kon se geh nau rêh jêr jŏt:

            ‘Rmôt kơl an nŭih rven rvo Việt Nam mro geh nau rvê mhâm ƀư gay nau kan mât chăm ân kon se rêh kon đơi mô knŭng geh nsrŭng tâm nau kơl an prăk rêl ma hôm pơk nau nsôih gay ăp kon se dơi geh hăn nti tay, nchiăr gay hao tâm nau rêh, mô geh ân nchlơi êng ba kơi”.

            Đảng, Ngih dak nơm mro tâm ban nau mĭn gay hun hao sŏk kon nŭih lah n’gâng tơm khlay, lah nŭih, lah nkô̆ nau ndrel nau nsôih gay hun hao. Ndri ma, mât chăm ân kon se rêh kon đơi, kon se geh bu nchlơi ndrel ăp nŭih geh nau rêh jêr jŏt nkre lah nau kan bah Ngih dak, nkre lah nau dơi bah lam ntŭk rêh jêng. Aơ kŏ lah nau ơm ueh kơl an bah rnoi mpôl, mât chăm kơl an ndrel pơk trong gay kon se geh hăn nti, hun hao ăp ntil, nâp nhoat jâng jêng nŭih gĭt blau geh nau dơi ân nau rêh jêng kon nŭih./.