Ta dâng lŏ Soi, thôn Nam Phước, xã Nghĩa Giang, n'gor Quảng Ngãi ăp dâng ba lŏ dôl lăp tâm yan rek geh băm dak bŭk. Geh ntŭk, kanŭng hôm  chông play ba ntoh bah lơ dak; geh ntŭk, lĕ dâng lŏ ba chôt pă hăch lĕ rngôch. Nuĭh ƀon lan an hăn lăp tâm tâm lŏ rek nchăp ba, đâng ta duk grip ma tơm prit rdeng let kơh.  Rnăk vâl wa Lê Thị Kiều, ta thôn Mỹ Tịnh, xã Nghĩa Giang geh 4 sào ba lŏ, 1 sào geh dak băm jru âk nar. Wa Kiều đă mpôl kan dân quân xã kơl rek ba: "Dak rdu nkre ma tơm ba băm lĕ ba lŏ, rnăk gâp hăn donh lĕ ba kon băm ta ba lŏ. Aƀaơ dak lĕ soăt n’hanh geh xã kơl mơ geh rek nkre. Bâh ơm ôi nơh xã kơl 6 nuĭh jur kơl rek ba. Đah bar pe hê bu klô jur roih ba i mô hôm dơi rek. Lah mô geh kơl rĭ nklơi dơm, mô hôm dơi rek”.

 Âk nkual lŏ dak băm jru, ba geh dak băm âk nar lĕ ntơm luh hon neng. Kônh wa ndăn tĭng mông dak rhuăt gay ma rek ba. Ta nkual lŏ, nău nuĭh ƀon lan kuăl jă, nteh nh’eo rek ba ndrel máy rek rpăt ba, njêng nău rêh ngăch ndăn ta aơ.  Ăp nar bah năp, yuh Nguyễn Thị Thu Hiền, Kruanh rnâng kan pah kan Mặt trận thôn An Hội Bắc 2, xă Nghĩa Giang, ndrel rmôt kan tâm thôn ntop kơl kônh wa thôn Nam Phước rek ba:  "Ăp yuh bu ur hăn jŭr ta lŏ rek, jêh nĕ dân quân mbra rdeng ba let kơh. Nar naơ, lŏ mpeh đah tê̆ dak băm jru ngăn, ba lĕ hon lĕ rngôch. Hôm ta mpeh đah aơ ôi aơ dôl ƀư rĭ dak băm đŏng. kêng măng nar naơ ta lŏ aơ dak rhoăt, mô dơi jur. Lap ma mô hôm geh mih jêng ôi aơ dak rhoăt ngăch. Rnăk vâl gâp nchrăp rek, dĭng âk geh rĭ mbơm dơm”.

Ta xã Nghĩa Giang geh 19 ha ba geh dak băm. UBND xã rgŏ jă mpôl dân quân way kan, ăp chi hội bu ur n'hanh mpôl kan ta ăp thôn jŭr kơl nuĭh ƀon lan. Wa Cao Thanh Tuyên, Groi kruanh UBND xã Nghĩa Giang, n'gor Quảng Ngãi an gĭt:  "Bah năp măt, xã rgum ăp tơm nuĭh kan rek, đăp mpăn tâm di ngăch đah trôk nar. Tal bar đŏng lah xã kan nsum đah ăp nhih pah kan geh tât, nchrăp mbra rgâl mông nar ăp yan srih tăm mhe gay ma der ban rơh mih ơm kơt aƀaơ. Ntĭt lah, năm ba kơi he mbra rgâl nar khay srih tăm, rgâl nar pă dak an ƀon lan ơm lơn đah rơh aơ klâp ma 10 nar. Lah rnôk srih tăm geh ntrôl ơm lơn ta rnôk aơ rĭ tât aƀaơ lĕ lôch rek ba da dê hôm”.

 Ăp nar bah năp, âk nkual ta n'gor Quảng Ngãi ntoh mih têh tât dŭt têh, ƀư rlău 63 héc ta ba n'hanh biăp bum geh khuch. Tâm nĕ, rlău 48 héc ta ba ta ăp xă An Phú, Nghĩa Giang n'hanh Đình Cương geh dak băm. Rlău ma nĕ, bơi 15 héc ta biăp bum ta xă An Phú geh khuch yor mih têh. N'gâng kan ƀon lan n'hanh ăp rmôt kan ta ntŭk dôl ntop kơl nuĭh ƀon lan rek ba gay bah ir khuch khat.

Thanh Thắng/VOV-Miền Trung