Ăp nar nklang khay 9, tâm nkuăl gŭ mhe tâm xã Cát Tiến, n’gor Gia Lai, rlau 40 rnăk ƀon lan dôl nchrăp ndal ma nau nkra ngih mhe. Ntŭk nkra mhe êp ma ntŭk ƀon ơm nklăp 500 mét, neh lâng tâm ban, geh điện, dak ndrel trong hăn ƀư nâp ueh. Lah ngoai tâm ăp rnăk jêh ơm, wa Bùi Thanh Vương hŏ tât ntŭk gŭ mhe geh du khay: ‘Ngih dak kơl an gay kônh wa hăn tât gŭ tâm ƀon lan mhe ri rhơn ngăn. Yan mih bơi tât êp hôm ri ma kônh wa đă nŭih bu ê nkra ân ngăch jêh ngih gay ma der bah nau rluh tay yôk, tâm aơ mih tât ri klach ngăn. Rnôk aơ ri thợ điện, thợ nglăp dak tât âk ngăn gay ma pă ƀư nau kan. Êng gâp nơm ri geh 2 săm ƀŭt bu pă nau dơi dŏng neh, ndơn geh 2 blah neh mhe ta aơ”.

Ndrel ma rnăk wa Vương, âk rnăk ƀon lan tâm thôn Trung Lương, xã Cát Tiến kŏ nchrăp nau ndâk ngih nkre rnôk geh jao neh, đah nau ŭch ơm luh bah nkuăl mra geh nau rluh neh yôk. Wa Mai Trần Hải, nŭih ƀon lan thôn Trung Lương, ân gĭt, bah năp nơh rnôk geh mih, sial, rnăk wa hăn ntrơn tât ntŭk êng mơ. Rnôk aơ geh neh bu ân gŭ mhe ndrel prăk kơl an, rnăk nơm ân manh bu nkra ngih mhe:  ‘Lŭ rêh rlâm luh jur tât ngih ƀon lan, tâm ăp nkuăl nê ri ƀon lan bu ntrơn du lĕ, mô geh bu ân nŭih gŭ tâm nê tay ôh”.

 Nau rvê nê ntơm geh tă bah nau rluh neh tâm yôk Cấm tâm khay 11/2021, ƀư rlâm 40 ngih tâm thôn Trung Lương. N’gor Bình Định kŏ rnôk nê mbơh nau kan ndal mpeh nau rluh neh tâm nkuăl aơ. Nkuăl ndâk tay nau kan ntrơn du tâm ntŭk gŭ mhe tâm 64 rnăk ƀon lan tâm nkuăl dôl tât jêr. Wa Lại Minh Đức, Kruanh thôn Trung Lương, mbơh, tât rnôk aơ, 44 rnăk hŏ ndrel ndâk ngih tâm ntŭk mhe:  ‘Ntŭk gŭ mhe rnôk aơ ri kônh wa hŏ tât lĕ ndrel gŭ geh nklăp 80% hŏ geh ndơn prăk tât ntŭk gŭ mhe gay ma nkra ndrel ndâk ngih. Hôm 20 rnăk ƀon lan hôm dôl ma bonh đă gay ma tât ntŭk gŭ mhe”.

Wa Nguyễn Ngọc Thạch, Groi Jrâu kan Văng sa xã Cát Tiên, mbơh nkuăl dôl lŏ ntrŭt dăng nau ƀư ngăch nau kan trok tâm, hăn ntrơn leo ƀon lan; nkra lah ndâk nau ƀư mât đăp mpăn ân ăp rnăk ê dơi geh ntrơn hăn tât tâm ntŭk gŭ mhe: ‘Tâm rơh tât nsôih gay ntrŭt dăng ngăch nau ntrơn leo ƀon lan gay kônh Wa đăp mpăn nau rêh jêng tâm rơh tât, UBND xã kŏ ndâk ƀư nau kan ntrơn leo ƀon lan, êp nê hŏ ndâk nau nchrăp nau kan njrăng rdâng nau tât khuch khat bah năm 2026. Mô êng lah yôk Cấm, ma xã kŏ dăp ƀư nau kan n’hêl, lah geh nau khuch nkuăl mra nsôih ntrơn leo nŭih ƀon lan tât ntŭk gŭ đăp mpăn kơt lah ngih săm ƀŭt, ntŭk prêh kơl an kônh wa”.

Ntơm bah nkuăl neh mro rdâng ma nau rluh neh, ƀon lan tâm jâng yôk Cấm dôl ăp nhoat ntrơn tât ntŭk đăp mpăn lơn. Ăp ngih mhe mô êng kơl an kônh wa đăp mpăn nau rêh, ma hôm lah nau dơi bah nau nchrăp hăn ntrơn luh bah nkuăl mra geh khuch. Yơn lah, rnôk yan mih tât nau ƀư jêh nau kan ntrơn leo lŏ lah nau kan ndal, gay huch nau tât khuch bah rluh neh, đăp mpăn nau rêh jêng ndrel dăp ndơ bah nŭih ƀon lan./.