Rnôk trôk hôm ngo, tâm năk ŭnh bah Nhih nti Phổ thông dân tộc bán trú Tiểu học Tu Mơ Rông hŏ hit gring ŭnh. Nuĭh n’gon trău, nuĭh nchrăp bánh phở, nuĭh dâk gŭch gâm, tâm pă nsum tĭng gâl kan gay năn sa ôi an rhiăng kon se nti.

Du nar bah ăp nai ntĭm ta aơ ntơm ơm lơn rđĭl đah nteh gâr goh bah nhih nti.

Nai ntĭm Dương Thị Kiều, nai ntĭm jrô 1A2, jay ngai nklăp 5 km. Ăp nar, bah 4 mông ôi, nai ntĭm hŏ ncho ndeh tât nhih nti ndrel ăp nai ntĭm êng nchrăp mbâr sa an kon se nti. Nău kan ntơm bah rnôk trôk hôm ngo, yơn rgâl tay, kon se nti geh tay du mbâr sa ôi duh kah lor rnôk lăp jrô nti.

“Bol rgănh đê̆ đă mô lah ji bĭch yơn dŭt rhơn yor kon se nti geh du mbâr sa ôi gay an ăp kon se hăn nti ăp tŏng lơn”.

Nklăp 6 mông ôi, kon se nti ntơm hăn tât nhih nti. Geh oh dơi me bơ̆ njŭn ma ndeh honda, geh oh hăn jâng bah ƀon ngai đah nhih nti bar pe cây số. Ăp tô phở duh dơi ndơ̆ tât ti kon se nti. Lôch sa, ăp kon se nti plơ̆ sĭt jrô nti, ntơm du nar nti mhe.

Đah kon se nti nkual prêh Tu Mơ Rông, du mbâr sa ôi ta nhih nti mô dơn lah nău ngêt sa. Nê hôm lah tơm suan dăng gay ăp kon se nti tŏng suan gŭ nti, lơn lah đah ăp kon se ngai jay, ân hăn jâng âk cây số tât nhih nti. Lơn âk kon se nti lah oh kon rnoi mpôl đê̆. Rnăk wâl hôm âk jêr jŏt, nău geh du mbâr sa ôi ăp tŏng lor rnôk hăn tât jrô nti mô di ăp tơ̆ geh nău dơh da dê. Oh Y Kim Ngân, kon se nti jrô 5A5, mpơl nău:

“Ndơ sa ta aơ kah ngăn. Nar aơ gâp sa bún n’hanh chả. Gâp hăn tât bah ơm, lôch sa gâp mbra hao jrô nti nti bài”.

Bah kơi ăp mbâr sa ôi nê lah nău rgop suan bah âk nai ntĭm tâm nhih nti. Nai Lê Tấn Thức, hŏ bar năm râng kơl n’gon trău. Nău kan mô gŭ tâm nău way blău ntĭm nti, yơn đah nai ntĭm ta aơ, nê lah du gâl nău dơn kan đah kon se nti:

“Gâp gŭ ta nkual gŭ nsum aơ đŏng, jêng ntop kơl ndrel mpôl kan n’gon trău gay gâm an ăp kon se sa ôi, an ăp kon se khân păng hơm ndŭl. Kon se nti ta aơ bah ôi way đêt geh sa ôi, jêng nhih nti ƀư kơt aơ ăp kon se dŭt rhơn. Gâp kơt rhơn nkre đŏng”.

Năm nti dja Nhih nti Phổ thông dân tộc bán trú Tiểu học Tu Mơ Rông geh 902 kon se nti, tâm nê 665 oh mpeh săk dơi kơl gŭ bán trú. Trong ntop kơl lơn âk an sa nar. Tâm rnôk nê, mô di ăp kon se nti geh ndơ ma sa ôi lor rnôk hăn nti đŏng ôh. Geh kon se nti ngai đah nhih nti âk km, geh oh ân hăn jâng. Đah ăp kon se nti dja, nău hăn tât nhih nti di mông geh rnôk ntơm bah du nău kan ngăn dơm: geh du mbâr sa ôi.

Bah nău ngăn geh nê, nhih nti ƀư an kon se nti sa ôi. Trong ntĭt leo dơi ƀư bah năm nti bah năp nơh n’hanh ƀư tay tâm năm nti dja. Gay ăp mbâr sa ôi dơi mât mbro, mô dơn geh nai ntĭm rgop suan ma me bơ̆ kon se nti nsum ti đŏng. Ăp ôi njŭn kon hăn nti, du đêt me bơ̆ ndjôt nkre nchăp long an nhih nti đŏng. Ăp nchăp long dơi dăp grep bah meng năk ŭnh, jêng ndơ gay ăp nai ntĭm sŭnh ŭnh, gâm ăp mbâr sa ôi an kon se nti.

Nai ntĭm Hồ Thị Thuỳ Vân, Hiệu trưởng Nhih nti Phổ thông dân tộc bán trú Tiểu học Tu Mơ Rông nkoch, nău gâm ndơ sa ôi an kon se nti ƀư nai ntĭm r’ah lơn, yơn rgâl tay kon se nti ngăch dăng, way gơih nti n’hanh geh nău dơi ntĭm nti uĕh lơn:

“Rnôk ƀư nău kan dja ri ăp nai ntĭm dŭt hât ngăn đŏng, yơn trok tay kon se nti ngăch dăng, ŭch hăn nti n’hanh nău dơi kơt nti dơi n’hao đŏng. Nê lah nău rhơn dŭt têh bah nai ntĭm nti pah kan ta nkual jru, nkual ngai”.

Yơn gay geh ăp mbâr sa rhơn mƀak nê, ăp nai ntĭm ân rgâl ma mông nar rlu rlău bah he. 4 mông ôi sŭnh ŭnh. Nklăp 6 mông wơt kon se nti. Tât 7 mông, rnôk kon se nti lôch sa ôi, ăp nai ntĭm prăp ndơ lôch nê plơ̆ tay đah nău kan way kan he nơm: hao jrô nti, rgum nchih nău nti, mât chăm kon se nti. Du nar pah kan bah nai ntĭm yor kơt nê ma jong tay.

Ta nhih nti nkual yôk prêh Tu Mơ Rông, ăp chông ŭnh hôm dơi sŭnh ăp ôi đŏng, yor bah năp lah ăp kon se nti ân dơi sa hơm gay nti rplay siƀŭt. Ăp nău kan ngăn nê lah du trong ndơ̆ nuih n’hâm Nghị quyết 71-NQ/TW bah Bộ Chính trị mpeh đăt ndal hun hao ntĭm n’hanh nti lăp tâm nău rêh đŏng.