Tâm nău way ueh ơm bah nuĭh Êđê, nău nteh chĭng mô di lah nău nteh bah ndơ uh goh. Nĕ lah nău kuăl bah nsum mpôl, lah nău nteh ntoh tâm ăp rnôk khlay bah nău rêh kon nuĭh. Kon se deh geh nău nteh chĭng rhơn m’ak. Rnôk nuĭh ranh sĭt đah u che, nău nteh chĭng lŏ n'gloh n'gôr.

 Nghệ nhân Y Tŏ Byă, hôm kuăl lah Aê Sa, ta ƀon Dang Kang, xã Dang Kang, n'gor Dak Lak nkoch, nău nteh chĭng gong mô dơi mô geh tâm nău rêh. Yơn gay dơi tŭr goh blău, ăp nuĭh nti chĭng ân ntơm bah ăp nău nteh dơh ngăn - chĭng rla:  "Tĭng nău way, tâm ăp nău ƀư brah bah ƀon lan, nău nteh chĭng way mât du ntŭk gŭ khlay. Ăp rnôk ƀư nău way ôp brah lah yang, nău nteh chĭng lŏ dơi tŭr. Yơn bah năp đaơ, ân tiăr nti đah chĭng rla. Rnôk lĕ blău tĭng nău nteh chĭng, khân păng nti tay n'hanh ƀư tĭng đah chĭng kông. "

Ntơm bah ăp nău chĭng gong bôk năp, nuĭh nti mbrơi mbrơi ƀư bên đah ăp nău nteh, ăp nău tŭr. Gay ma lôch nĕ rnôk nău nteh chĭng gong n'gloh tâm ăp nău ƀư brah, ăp nău chĭng gong mô knŭng djôt tĭng nău nteh, ma hôm njôt tĭng ăp nău khlăy văn hóa dơi trêng tay bâh âk rơh. Nghệ nhân Y Ka Niê (Aê Cứu), ta ƀon Dang Kang, xã Dang Kang, n'gor Dak Lak an gĭt. "Aƀaơ gâp lĕ âk năm deh hôm, yơn gâp hôm e nsrôih ntĭm chĭng gong an kon său tâm ƀon đŏng. Tât aƀaơ, gâp lĕ ntĭm geh du rmôt, ăp mon hŏ tŭr blău ăp nău chĭng gâp ntĭm. Gâp mpŏng kon său ntĭm nti tay n'hanh mât nău nteh chĭng gong, gay mô roh nău way ơm bah rnoi nuĭh he.".

Đah nău ntĭm nti dŭt n'hâm bah ăp nghệ nhân, nău nteh ta ăp rơh nti chĭng tâm ƀon lan way n'gŭr răm. Nê mô dơn lah nti trong tŭr du gâl chĭng. Nê hôm lah rnôk gay ăp kon se gĭt lơn mpeh văn hóa bah rnoi nuĭh he. Geh oh mhe 7 năm deh lĕ ntơm ƀư bên đah chĭng gong. Bah meng jay rot, nău nteh chĭng tĭng ăp oh tât ngih nti, tât ăp nău ƀư nsum mpôl. Nô Y Tloi Niê (Ama Tra), du hê nŭh ƀon lan ta ƀon nkoch: "Nău mât ndray, mât uĕh n'hanh ntĭm nti chĭng gong ntơm bah nău ŭch êng bah kônh wa tâm ƀon lan. Mpôl hên hôm e ntĭm nti an kon său, bah ăp kon se jêt tât ăp nuĭh ranh. Lơn lah, rơh nuĭh ranh ntĭm nti tay an kon său ntơm bah 7 tât 8 năm deh, nkre nchrăp ntĭm nti an ăp kon se nti ta ngih samƀŭt gưl"

 "Ngâr ma sro, rdo ma wăm", yơn bah năp ăp nău rgâl ngăch bah nău rêh âk nuĭh druh ndăm lĕ lăp tâm nău hăn ngai ƀư wăng sa, jêng mô di ăp rnôk ƀon lan dơi rgum tŏng rmôt chĭng gong mom. Nê lah nău mĭn rvê bah nghệ nhân Y Cheo Byă (Aê Bươm), ta ƀon Dang Kang. "Ngăn lah, rmôt nghệ nhân mpôl hên lĕ ranh, yơn hôm nha ndrel tiăr nti. Khlăy lơn lah ta ntŭk an geh nău nchrăp ntĭm nti rĭ nău mât rbăy n'hanh n'hao nău chĭng gong mbra geh nău dơi ueh lơn. Aơ mô di lah nău kan bâh êng ăp nghệ nhân mpôl hên, yor năm hên lĕ ranh, jêh aơ tay mbra mô hôm tŏng soan gay ma hăn tŭr goh đŏng."

 Nău nteh chĭng Dang Kang aƀaơ hôm e n'gôr răm ăp rơh lễ hội. Yơn lah lôch ăp nău nteh chĭng n'gôr răm nĕ lah âk nău mĭn rvê bâh ăp nghệ nhân ranh. Nău ŭch rŏng n'hanh nău nsrôih bâh ăp nghệ nhân dôl ma trêng tay nău "huêng" bâh bri yôk đah rơh mom ndăm. Gay ma ăp rnôk măng sĭt, ta bri yôk, bu hôm e geh djăt nău nteh chĭng n'gôr răm kơt lah nău nteh mô lĕ tă geh nău mô rlu bâh ƀon lan Dang Kang./.

H Zawut Byă-Y Sưng dịch