Ƀư tĭng Nghị quyết mrô 08 năm 2021 bah HĐND n'gor Dak Lak mpeh ntop kơl hun hao pâl nđaih nsum mpôl ta ăp thôn, ƀon rnoi mpôl đêt lvang năm 2021-2025, tâm 3 năm bah năp, ta ntŭk lĕ ntop kơl 5 ƀon n'hanh 22 rnăk, đah lĕ rngôch prăk dŏng trok tâm nklăp 4.2 rmen prăk. Tơm ndơ dŭt âk dơi ntuh kơl an ntŭk ntô ndơ dŏng, ntŭk ntô uĕh măt uănh, ntŭk ntĭt mpơl, jay ăch chrach, ntŭk prăp ndơ sông sa, ndơ nsoh n'hanh ndơ uh goh.

Nău kơl bôk năp nta trong dơh gay nuĭh ƀon lan râng pă an ndơ rhŏ dŏng ntŭk gŭ rlu, ndơ ngêt sa, njroh mprơ văn hóa n'hanh ntĭm nti nău ƀư ngăn. Yơn lah, lơn âk trong ntĭt leo hôm e jêt; ndơ geh ƀư đah ăp ƀon hôm e tâm trŭp, tâm rgop đah doanh nghiệp hăn pâl nđaih mô hŏ rjăp. Rnoh năch n'hanh tơm prăk mô hŏ đăp mpăn, ƀư jêr jŏt an nău mât nkra ndơ dŏng, ntuh kơl tay n'hanh mât nău kan jêh rnôk lôch ntop kơl. Wa H Zu ni Niê, Bí thư Chi bộ ƀon pâl nđaih nsum mpôl Akǒ Dhông mĭn lah, nău kơl mhe ân hăn ndrel jŏ jong lơn đah nsum mpôl. "Nau ntrŭnh 08 năm 2021 bah HĐND n'gor lah nau  tơm khlay gay hun hao pâl n'aih nsum mpôl, ntơm bah ăp jrâu ntĭm nti pâl nđaih ân tât nau kơl an ndơ dŏng, lah nau nsôih têh gay ƀon lan hun hao pâl n'aih êng. Ŭch nau ntrŭnh lvang năm 2026-2030 mra ƀư jêh lơn mpeh nau kan, mô knŭng kơl an du tơ̆ ma mbra lŏ ƀư tĭng nkre; geh ăp nau kơl an ngăn lơn đah ăp nŭih ƀon lan hôm mât jay nhih, ăp nŭih blau tur chĭng mô lah nŭih blau tanh njuh."

 Ta rơh rƀŭn nchră, ăp đại biểu HĐND n'gor Dak Lak kŏ ntoh âk nau rgop, nau đă mpeh nau kan lvang năm 2026-2030 ntrơn tă bah nau kơl an tĭng nau kan jêng hăn ndrel tâm lĕ rnôk ndâk njêng ndơ, ƀư nau kan ndrel tât ntŭk tăch rgâl. Nkre, doh rklaih ăp nau kol mpeh neh ntu, tơm prăk manh ndrel ntŭk ntu kơl an, ân geh ƀư kloh nau kan mât, nkra ndơ dŏng; n'hao nau blau ndrel nau dơi tâm rgop gay nŭih ƀon lan ngăn ngên ƀư tơm nau kan pâl nđaih.

 N'glôn jêh rƀŭn nchră, wa Cao Thị Hòa An, Groi Bí thư Rnâng kan Tỉnh ủy, Kruanh HĐND n'gor Dak Lak đă UBND n'gor ndăn mĭn uănh trong ƀư mhe rgâl an Nghị quyết mbrô 08 mpeh ntop kơl hun hao pâl nđaih nsum mpôl ta ăp thôn, ƀon rnoi mpôl đêt.  "Gâp đă UBND n'gor ân mĭn njêng, nsŏng kơl gay n'gluh an dŏng trong ƀư mhe rgâl an nghị quyết ơm. Ăp jêr jŏt, wăk kol, mô hŏ dơi ƀư ri he ân geh trong rƀŏng, trong nkra gay ƀư uĕh lơn. Sŏk nuĭh ƀon lan, doanh nghiệp n'hanh ƀon lan ƀư rgum tơm gay ntrŭt ntrôl trong ntĭt leo tâm rgop hợp tác xã pâl nđaih nsum mpôl đah doanh nghiệp lữ hành; ntĭm nti, tiăr nti ta ntŭk mpeh nău blău, nău ngơi, ndơ sa gay ƀon lan nơm ƀư rêng pă an ndơ rhŏ dŏng".