Ta ndrâm ka Phú Lạc, phường Hòa Hiệp, bah năp rnôk hăn dak lêng, ăp ndơ dŏng mpeh samƀŭt, ndơ dŏng uănh nđôi trong hăn, nchih mông nar hăn joi ka n'hanh nkual joi ka dơi uănh nđôi, nkah tay. Ăp nuĭh mô hŏ tŏng nău dơi mô dơi an hăn luh ndrâm. Wa Phan Thanh Lực, nŭih mât ntŭk tăch ka Phú Lạc ân gĭt, ndrel đah nau mêt uănh bah rmôt kan, nău mbơh tơih ƀa ƀơ kơl an ƀon lan gĭt na nê̆ ăp nău ntrŭnh an geh ƀư tĭng ntơm rnôk nchrăp hăn dak lêng. “Lĕ rngôch ăp ntŭk kan ndơ̆ ƀon lan lăp gay dêr nău 3 mô. Geh nchih mông nar tŏng ăp, ntĭt nsa kơt mô hŏ lăp tâm dak lêng dak bah dih”.

Thiếu tá Lương Công Hậu, Groi kruanh Pôih tahen n’har bri Hòa Hiệp Nam an gĭt, nău mât uănh dơi ƀư lĕ rngôch tâm rnôk duk joi ka. Tât aƀaơ, ta nkual ntŭk aơ mô hôm geh duk ka mpeh tâm "3 mô"; ăp duk mô hŏ dơi ntrŭp ndơ uănh nđôi trong hăn n'hanh an geh ƀư tĭng nău ntrŭnh rnôk ndơ dŏng geh nău tât.“Ƀon lan joi ka tĭng jăp ăp nău ntrŭnh mpeh njrăng, ngang joi tui ka IUU. Aƀaơ, ta ntŭk mô hôm geh du bôk duk lơh joi ka mpeh tâm "3 mô"; Ăp bôk duk joi ka lĕ geh ntrŭp tŏng ăp ndơ uănh nđôi trong hăn n'hanh ƀư tĭng rjăp ăp nău ntrŭnh mpeh nău nkra rgâl rklaih rnôk ndơ dŏng geh nău tât, gay đăp mpăn di nău ntrŭnh bah pháp luật”.

Mô knŭng uănh nđôi ta ndrâm dak, n'gâng kan ƀon lan hôm ndơ̆ nău kan mât uănh rmôt duk mpan mpeh tâm nkual ƀon lan gŭ. Ta ăp ntŭk bah năp đaơ tă geh nău tih sŏk joi IUU, ăp nkual ƀon têh kan nsum đah mpôl kan dơi kan mât uănh duk mpan bah ăp rmôt duk mpan đăp mpăn lĕ rngôch; kruanh bôk duk dơi nkoch trêng, ký ton, tâm nĕ uănh khlay ngăn rmôt duk joi tui ka dak lêng têh.

Đah ăp bôk duk mô tŏng nau dơi pah kan, n'gâng kan ƀư nau mêt uănh tâm ntŭk gŭ kâp 24 mông ăp nar. Ta phường Phú Yên, ntŭk geh rmôt duk lơh joi ka dak lêng têh nău kan dŭt âk ta nkual dak lêng. Wa Nguyễn Xuân Cảnh, Kruanh UBND phường Phú Yên, an gĭt, pah kan mât uănh mpôl joi ka dơi ƀư đah nău tâm rgop đah n'gâng kan ƀon lan, tahen n’har bri, ndrâm ka n'hanh nkual ƀon têh. “Nkô̆ nău tâm rdâng joi IUU, mpôl hên lĕ ntĭm rđău ăp ntŭk kan geh tât tâm rgop rjăp đah Pôih tahen n’har bri Đà Rằng lŏ kơt lah Ndrâm ka gay ƀư ueh nau kan nău kan aơ; nkre tâm rgop đah nkual ƀon têh mât uănh rjăp mpôl joi ka tâm ban kơt ăp nuĭh ƀĭt rnôk râng hăn joi, ăp nar an tĭng groi nđôi, chŭp rup n'hanh mbơh tĭng nău ntrŭnh."

 Ndrel đah uănh nđôi, n'gor Dak Lak dôl âk ntil trong nkoch trêng gay ăp nău ntrŭnh rdâng joi IUU tât dơi đah ƀon lan kan lŏ mir du trong na nê̆ n'hanh ƀa ƀơ lơn. Ta phường Xuân Đài, cán bộ rgŏ jă ƀon lan Pôih tahen n'har bri Xuân Đài mô knŭng nkoch trêng tâm ăp rơh rƀŭn ƀon lan ma hôm tât ăp nkual ƀon lan gŭ, ăp rnăk wâl. Thượng uý Nguyễn Văn Liến, Groi kruanh Rmôt bonh đă ƀon lan Pôih tahen n’har bri Xuân Đài, an gĭt, rnôk âk bôk duk ka plơ̆ sĭt, mpôl tahen n'har bri dŏng loa mbơh ngơi nŭih hăn kan nkre pă săm ƀŭt ta ăp trong hăn, nkual ƀon lan gŭ, ndrâm ka n'hanh ăp ntŭk nuĭh ƀon lan way rgum. "Ntrong ƀư “Nteh loa tahen n’har bri” jêh rnôk ƀư lĕ nsĭt tay âk săk rnglăy. Ma trong ƀoh ngơi hăn ăp ntŭk ta ăp trong hăn, nkual ƀon lan gŭ n'hanh ndrâm ka, ăp nău mbơh mpeh njrăng, ngang  joi tui ka mô geh nău way mbra dơi njuăl tât kônh wa, kơl kônh wa ngăch gĭt tât."

Nău uănh khlay lah nkoch trêng njrăng n'gang joi ka IUU dôl tĭng kơn rgâl bah nău mbơh tơih nău ntrŭnh jêng nău bên ƀư tĭng bâh ƀon lan lơh joi ka. Ăp nău đă mpeh nkual treh joi, sam ƀŭt duk ka, nuĭh kan, sam ƀŭt nchih treh joi, ndơ ntrŭp uănh nđôi trong hăn nău blău mbơh tơih rnôk luh lăp dak lêng geh nkah tay ƀa ƀơ, ndrel đah nău kan na nê̆ đah tĭng nuĭh kan hăn dak lêng. Aƀaơ, kônh wa ƀon lan kan lŏ mir gĭt na nê̆ n'hanh ƀư tĭng răng dăng ăp nău ntrŭnh đă trong rdâng treh joi tui ka mô tâm di IUU.  "Mpôl hên ta aơ gĭt lĕ hôm, ƀư tĭng uĕh dơm. Sŏk dŏng an di" nkuăl, hăn dak lêng ân geh tŏng ăp săm ƀŭt, nŭih tâm duk ân geh đăng ký, chup rup. Rnôk hăn sĭt lah an geh mbơh tơih."

Kơp tât bôk khay 9/2026, Dak Lak geh 2.593 duk mpan bah 6 mét let lơ, tâm nê 689 bôk duk bah 15m let lơ; 100% bôk duk hŏ dơi nchih rgum tâm ntŭk mât prăp nău lư gưl neh dak. Nău kan uănh nđôi tàu luh, lăp, joi tu tơm tui ka n'hanh mât nău tâm boh kan ndrel VMS dơi n'hao dăng. Tâm khay 8 n'hanh pơh bôk năp khay 9, n'gor mô geh nău tih jêr jŏt mpeh sŏk joi IUU.

Ndơ̆ nău ntrŭnh tâm ăp rơh hăn dak lêng, ăp bôk duk n'hanh jêng nău gĭt êng bah nŭh ƀon lan kan lŏ mir lah trong nkra tơm gay Dak Lak ndrel lam dak ơm droh rklaih "Kah mah", rƀŏng tât nău kan ka nâp nâl, geh lĕ đah nău kan.