Ƀon Kret Krot, xã Hra, nkuăl Mang Yang tă geh rlău n’gul rnăk ƀon lan hăn tĭng chroh Hà Mòn, ƀư roh nău đăp mpăn rnă njrăng ta ntŭk. ăp năm ba năp, ndrel đah nău njrăng rdâng, nklơi jăng nău chroh aơ, n’gâng kan ta ntŭk lĕ geh njoat rgâl mhe, nglăp đảng viên mhe, ndâk nsơm trong kian chính trị. Bâh ntŭk ntơm mô geh đảng viên, aƀaơ, ƀon lĕ geh 9 đảng viên. Đảng ủy xã Hra pă an du hê đảng viênta ƀon mât leo du rmôt kan. Tĭng nĕ, đảng viên hăn lor tâm nău hun hao wăng sa, rdâk njêng nău rêh văn hóa ta nkual ƀon lan gŭ, ƀư ting ueh jăp ăp nău ntrŭnh, trong kan bâh đảng n’hanh ngih dak, nsrôih rgŏ jă, mbơh tơih, ntĭm leo ăp rnăk ƀư tĭng. Bâh nĕ geh saơ, nta nău dơh nơih ntĭm leo, hun hao ƀon lan jêng đảng viên mhe. Nô Sin- đảng viên ƀon Kret Krot, xã Hra an gĭt.

 “Đảng viên ƀư tĭng ueh jăp nău ntrŭnh bâh Đảng, ngih dak. Lah du hê đảng viên an hăn lor tâm ăp nău kan an ƀon lan ƀư tĭng, he ƀư an di an jăp gay ma ƀon lan uănh tĭng”.

Lam xã Hra nkuăl Mang Yang aƀaơ geh rlău 2 rbăn rnăk, 63% rnoh ƀon lan lah nuĭh rnoi đê̆. Lam xã geh 15 chi bộ, 177 đảng viên. Tâm nĕ, geh 3 ƀon tơm mpeh rnă njrăng chính trị le geh ƀư lôch mpeh nău leo kan, nău kan gâl ủy. rlău du n’gul rnoh nuĭh pah kan mô way kan ta ăp thôn ƀon lah đảng viên. xã nsrôih tât năm 2025 rnoh aơ geh tât 80%. Ntŭk kan đảng, đảng viên geh ndâk nsơm hun hao lah nău knơm an nău đăp mpăn, nâp nâl ta ăp ntŭk ƀon lan gŭ. wa Nguyễn Thị Huệ- groi kruanh HĐND xã Hra an git.

 “Lôch geh pă nău bâh Đảng ủy rĭ gâp Đảng ủy viên sit mât leo nău kan ta ƀon rĭ mbra geh nsrôih, nsrôih lĕ săk nơm. tal 1 lah sĭt ntĭm nti an chi bộ nău ƀư tĭng sinh hoạt chi bộ an geh di nău ntĭm 12 bâh rnâng kan leo kan Trung ương n’hanh nău ntĭm mbrô 03 bâh rnâng kan leo kan nkuăl ủy Mang Yang, lĕ geh kơl an chi bộ tâm rnôk leo kan, ntĭm đă an chi bộ ƀư tĭng ăp nău kan ta ntŭk, kơl an đảng viên tâm chi bộ geh gĭt vât nơm geh nău kan khlăy têh ta ntuk”

Đăp mpăn rnă njrăng chính trị, nău rêh bâh ƀon lan mô rlu geh hun hao rgâl mhe. năm 2023, nău geh râng geh du hê nuĭh ta xã geh rlău 40 rkeh prăk, rnoh rnăk acg o hŭch hôm 13,6%, râng geh du năm hŭch 5 tât 7%. wa Đinh Văn Tâm- groi Bí thư Đảng ủy xã Hra, nkuăl Mang Yang an git.

 “Tâm rnôk dăch aơ rĭ hên lĕ geh njêng ntŭk kan n’hanh geh ntĭm leo rƀŭn chi bộ ăp nkô̆ nău tâm di, rĭ mpôl hên geh pă đă du hê đồng chí lah công chức sĭt mât leo nău kan ƀư Groi Bí thư chi bộ, ndrel đah chi bộ rdâk njêng nkô̆ nău tơm khlăy. kơt lah rdâk njêng hun hao đảng lôch nĕ nău kan jut jăng ach o, nău kan njrăng rdâng chroh Hà Mòn”.

Trong kan chính trị lĕ geh njoat n’hao mpeh nău ueh di, săk tam, ntop mât đăp mpăn rnă njrăng chính trị, rgâl ăp nău kan tâm nău rêh bâh ƀon lan ăp mpôl rnoi ta Hra.