Ôi lơ 16/5, ta Quảng Bình, Trung ương Đoàn TNCS Hồ Chí Minh n’hanh Hội cựu Thanh niên Xung phong Việt Nam ntơm pơk rơh pla n’hơ rup, ăp ntil ndơ lịch sử đah bôk nău “Ntoh lư Trường Sơn”. Tât râng pla n’hơ geh âk nuĭh tahen ơm, mom ndăm ơm tât kan, cán bộ Đoàn thanh niên ăp n’gor Nghệ An, Hà Tĩnh, Quảng Bình, Quảng Trị, Thừa Thiên Huế, Quảng Nam, Dak Lăk, Gia Lai, Kon Tum, Đăk Nông n’hanh Bình Phước. Pla n’hơ 200 rup, săm ƀŭt kăl e dŭt ueh, na nê̆ tâm nău tâm lơh tâm su kăl e,pah kan ta trong Trường Sơn, mbơh tơih nău dơi bâh mpôl mom ndăm tâm lơh ta rơh mhe.

Ta Gia Lai, ôi 16/5, Mpôl kan way ơm tahen Trường Sơn nkual ƀon têh Pleiku, n’gor Gia Lai ƀư  nkah ndray 65 năm Nar way ơm tahen Trường Sơn. Ta rơh mâp măt, ăp đại biểu hŏ ndrel nkah tay nău way ơm dăng janh bah tahen Trường Sơn. Trong Trường Sơn – trong Hồ Chí Minh geh nkô̆  khlay mha êng hăn kơl bah suan nuĭh, suan ndơ ndơ têh an bôk trong tâm lơh mprơh Mỹ kơl neh dak, rklaih luh miền Nam, dơn ngoăy neh dak. Aƀaơ, trong Hồ Chí Minh lah ngoăy tâm ăp trong me khlay  hăn rlău 28 n’gor, nkual ƀon têh, tâm nê geh nkual ƀon têh Pleiku, n’gor Gia Lai, rgop hun hao wăng sa- rêh jêng kon nuĭh ta n’gor. Mpôl way ơm tahen Trường Sơn nkual ƀon têh Pleiku aƀaơ geh 87 hội viên, lơn âk lah tahen ơm rmanh, kop ji nuĭh ntưp dak si khêh dioxin. Bol lơn âk hŏ djôr  ranh yơn ăp nuĭh tahen Wa Hồ nsrôih pah kan jan sa hun hao wăng sa rnăk wâl đŏng.