Groi Thủ tướng Lê Thành Long, Kruanh hội đồng mât pă nău kan nkual Đồng bằng Sông Cửu Long leo rơh rƀŭn nchră. Tĭng nău mbơh bâh n’gâng kan kế hoạch n’hanh đầu tư, năm 2024, nău hun hao wăng sa rêh jêng ta nkual Đồng bằng sông Cửu Long dơi geh âk nău geh kơp dơn. Nău ngăch hun hao wăng sa bâh nkual geh tât 7,31%, âk lơn rnoh râng geh ta lam dak klâp ma 7%. Âk nău nchrăp kan, nău kan tơm ta nkual geh mbơh tơih, rdâk njêng, nta nău dơh nơih an tâm rgop ta ntŭk, ăp n’gor. Yơn lah, nău wăng sa rêh jêng lam nkual hôm nha geh âk nău rêh, nău wăng sa hôm nha jê̆, 12/13 ntŭk ta nkual ê hŏ geh tâm di đah nău geh tơm prăk ngih dak, jêng tât nău mô tŏng dak dŏng n’hanh pah kan. Ntoh ngơi ta nglôch lôch rƀŭn nchră, Groi Thủ tướng Lê Thành Long đă ăp ntŭk an geh nsrôih ƀư tĭng nău kan pă kan ta nkual, doh rklaih ăp nău ntul rlong dôl geh. Đah ăp nău nchrăp kan tơm ta nkual tâm let năp tay, an geh an lor mpeh pă prăk an ăp nău kan khlăy bâh ngih dak, nău kan ndơ dŏng tơm ntop ntrôl an hun hao wăng sa rêh jêng ngăch, nâp nâl.