Ta Tâm nchră Hội đồng tâm pă nău kan nkual Tây Nguyên mhe dơi ƀư, Groi Thủ tướng Rnâng kan Chính phủ Nguyễn Hòa Bình đă ăp n’gâng kan, ăp n’gor tâm nkual ntrôl ngăch ƀư ăp ntung trong ta nkual Tây Nguyên. Ta tâm nchră, ntơh măt ăp n’gâng kan hŏ tâm nchră mpeh nô nău hun hao wăng sa- rêh jêng kon nuĭh, nô nău an ƀư ăp nău kan bah Hội đồng tâm pă nău kan nkual Tây Nguyên năm 2024 n’hanh nchrăp bôk nău kan năm 2025.

Nkre dăn đă mpeh trong rƀŏng, trong nkra rgum tơm n’hanh nău dơn kan ngăn ngăn jao an ăp n’gâng kan n’hanh ăp n’gor nkual Tây Nguyên gay ƀư tâm nkrêp kan nsum hun hao nkual  nsĭt geh dŭt âk nău dơi; Tâm nê lah rjăp ăp nkô̆ nău mpeh hun hao ŭnh nar sĭt jêng tay, trong nchrăp ntuh kơl ƀư ntung trong buăt nthoi nkual, dăp rgum kuĭh joi loih kông. Groi Thủ tướng Rnâng kan Chính phủ Nguyễn Hòa Bình đă ăp nuĭh tâm Hội đồng tâm pă nău kan nkual Tây Nguyên, ăp n’gâng kan dơi kan, ăp n’gor tâm nkual nsrôih tay, lor nchrăp lơn đŏng tâm nău an ƀư ăp nău dơn kan, trong nkra hŏ ndơ̆ luh, lơn  lah ntrŭt ntrôl ƀư ăp ntung trong hôm dôl ƀư mbrơi nkai; rđău đă tĭng ƀư geh nău tam nău dơn kan an ƀư wăng sa- rêh jêng kon nuĭh nkre đah mât rnă njrăng, njrăng n’gang neh dak ta nkual Tây Nguyên.