Ƀon Kla xă Dray Sáp kơt âk ƀon lan Êđê ta Dak Lak, đah trong hăn thôn ƀon mhe n’hanh ăp mir cà phê đah ăp mpông jay nhih. Yơn tâm trôm tâm ƀon K’La lah nău êng đah ngih măy nkret njêng cà phê ăp nar rêng ƀô kah. Nĕ lah ngih măy bah công ty Cổ phần Êđê Café.

Y Pốt Niê -nuĭh ndâk njêng n’hanh lah Giám đốc ƀĭt joet bah công ty dôl gŭ ta aơ. Nô mhe pơk măy wâr, kĭn, săch, nkre ty ƀư-mbung ngơi, mĭn njêng mhe nkô̆ nău mrô mpeh nău nkoch doanh nghiệp nơm dŏng măy mŏk mhe gay nkra njêng ăp ntil cà phê uĕh kah.

Jêh 4 năm ntơm ndâk njêng nău kan, bah du nai dak si plơ̆ sĭt đah nău kan ƀư cà phê, Y Pốt Niê lĕ rlet rlău âk jêr jŏt đah mpêr n’gang nău ngơi, n’ăp đah prăk n’hanh nău blău ơm. Nô nkoch, gâp dŭt lap rnôk bôk năp lĕ uănh khlay nău tâm rgum đah văn hóa n’hanh tăch rgâl. Ndơ “Cà phê nsoăy ŭnh” ndrel nău nkoch mpeh mpeh ŭnh long, n’glah, mpăl n’hanh mbang ty hăr bah ăp mê̆ tâm ƀon K’La rnôk ƀư luh ntil cà phê aơ, lĕ kơl nô joi âk nuĭh rwăt n’hanh ăp nuĭh kan ndrel.

Gâp dŭt lap rnôk mhe ndâk njêng nău kan luh, ndơ bôk năp, lĕ djôt tât ăp nuĭh geh ndrel đah nău ŭch kơt gâp. Khân pơng lĕ kuăl điện dăn dơi hăn ndrel. Bah nĕ săk bah Pốt lĕ dăp nuĭh kan tâm công ty. Nuĭh ri mât uănh ndơ nkra njêng, nuĭh ri mât uănh nău wâr kĭn. Hôm săk Pốt lah nuĭh hăn joi, hăn ntrŭt ngăch tăch ta ăp n’gor, râng ăp hội chợ n’hanh lơn lah hăn ntrŭt ngăch tăch ta dak bah dih.

Mpêr n’gar đah nău ngơi dơi soih luh đah nău nsrôih nti mô rlu, aƀaơ Y Pốt Niê lĕ geh tŏng nsing nơm tâm ăp rơh hăn Thái Lan, Nhật Bản, Đức, Canađa. Ƀon K’la rngot rngăt n’hanh ngai nkual ƀon têh Buôn Ma Thuột, mô dơi ƀư jêr Êđê Café, yor ndơ bah công ty dôl dơi tăch ta ăp ntŭk tăch điện tử. N’ăp đah ăp nuĭh ranh ta ƀon K’La aƀaơ gĭt đah trong ƀư mhe ta Êđê Café, dơi saơ nău uĕh, nău blău bah rơh druh ndăm. Wa Ama Băm, 64 năm, rhơn.

Pơng blău ngăn. Cà phê pĕ dŭm pơng gĭt, pĕ lĭt pơng git, pĕ nse pơng gĭt. Lah cà phê he pĕ dŭm lĕ hôm ri pơng rwăt khlay. Cà phê pĕ lĭt ri thuk, yơn mô thuk kơt ntŭk êng rwăt. Lah ntŭk rwăt 135.000 ri ta aơ pơng rwăt 136.000-137 rbăn prăk/kg.

Rlet rlău jêr jŏt, prăk tăch, nsĭt geh dơi rgâl tĭng năm, Y Pốt saơ răm rhơn yor ăp nău nsrôih bah nơm lĕ nsĭt tay nău khlay nâp nâl an ƀon lan.

Ăp nar dŭt năm, Y Pốt Niê lĕ râng Rƀŭn nchră mbơh trực tuyến bah Trung ương Đoàn mpeh “nău wât, nău ƀư bah druh ndăm mpeh rach năm mhe n’hanh nău ƀư, lĕ đah nău kan bah rơh druh ndăm”, nô lơ nsing nơm ăp nău khlay ma nơm tĭng mbra ndơ̆ nău kan cà phê, ndơ̆ ƀon lan n’hanh rơh druh ndăm tât đah ăp lôch uĕh mhe:

Săk bah Pốt ŭch trêng tay nău ŭch gay ăp oh jêt n’hanh ăp nuĭh kan mhe mpeh bah kơi aơ tay lah trong ƀư cà phê bah nơm gay dơi saơ nău khlay bah lŏ mir, nău khlay bah ƀon lan, gay an ăp băl mom ƀon lan rnoi mpôl đêt geh nău rgâl nău mĭn, ƀư uĕh lơn, hun hao lŏ mir ta ƀon lan nar lơ nâp dăng.