Bu ranh Cao Dáng, rnoi Raglai, tâm thôn A Xây bah năp nơh lah Kruanh UBND, Bí thư Đảng uỷ xã Khánh Nam, nkuăl Khánh Vĩnh di nkuăl geh tât 80% rnoi mpôl đê̆. Ăp năm nê, ji ngot, ach o mro tâm ƀon lan. Wa Cao Dáng hŏ ntrơn tăm ba tâm uir gay ma tăm ba dak tâm lŏ, kuih ntu rong ka, tăm tao, tăm play bŭng...Rnôk aơ, rnăk geh 2 ha tao, 2 ha keo lai, 3 sào play bŭng ân geh rnoh văng sa âk. Saơ wa Cao Dáng pah kan săk geh, kônh wa tâm thôn, tâm xã ƀư tĭng, tă bah nê, âk rnăk rklaih ach o. wa nkoch:

 ‘Kônh wa tâm ƀon nơm uănh nơm ƀư, bu kơt tĭng, ƀư tĭng. Tăm tơm sa play geh phân poh mât chăm, rep kloh mir tăm, tŏ dak gay ma tơm hao ngăch, ngăch luh play. Kônh wa rnoi Raglai bu saơ gâp pah kan jan sa dơi ri bu kơt. Gâp ntĭm an bu ƀư. Bah năp nơh, tâm thôn aơ đê̆ ngăn yơn tât rnôk aơ âk rnăk vâl hŏ tăm rtơm sa play, ƀư mir”.

Dŭt năm 2021, nkuăl Khánh Sơn hôm geh bơi tât 5000 rnăk ach o rnăk êp ach o, rnoh geh tlau 66% rnoh nŭih, hôm nkuăl Khánh Vĩnh ri hôm 5000 rnăk ach o, geh bơi tât 60% rnoh nŭih. Ndri ma aơ lah 2 tâm nroh 74 nkuăl ach o ngăn lam dak lvang năm 2021-2025.

Đah nau nsôih leo 2 nkuăl aơ ơm rklaih ach o, n’gor Khánh Hoà rgum âk tu tơm bah Trung ương, nkuăl ndrel rgum âk nau kơl an tă bah êng gay ntuh kơl, ntrŭnh ƀư ăp nau kan hun hao văng sa, rêh jêng. Êng nau nkra ngih vâl gung trong ri n’gor Khánh Hoà uănh khlay nau kan rêh jêng, nau nau geh, n’huch ach o ân ăp rnăk. Ăp nau kan ntrơn rgâl tơm tăm, mpa rong geh mbơh ƀư tât ăp thôn, ƀon. Mô êng ntĭm mbơh, pă kon ntil, ma ăp đảng viên, nŭih bu rnơm hôm ƀư leo trong lor gay kônh wa tâm ƀon lan kơt tĭng. Ăp nŭih bu rnơm hôm nkoch trêng, mbơh bonh ân kônh wa n’hao nau mĭn, nau kan, nsôih rklaih rnăk ach o, êp ach o. Bu ranh Mấu Xuân Nghi, tâm thôn Dốc Gạo, nkuăl têh Tô Hạp, nkuăl Khánh Sơn, n’gor Khánh Hoà, mbơh:

  ‘Ƀư văng sa ngăn lah tăm sầu riêng, tăm nsum ma tơm prit gay geh ndơ sa ăp nar. Nŭih rnoi mpôl đê̆ bôk năp tăm đê̆, yor ê geh nau blau. Hên mbơh ma khân păng, geh nau kơl an bah Ngih dak kŏ ntĭm mbơh nau tăm tơm si, rnôk aơ âk nŭih tăm. Đê̆ ri kŏ geh 200 tơm, geh nŭih tăm du héc, geh rnăk ri sâm geh đŏng”.

4 năm rlau aơ, tơm prăk Trung ương ndrel n’gor hŏ ntuh kơl ân nkuăl Khánh Sơn rlau 600 rmen. Tât dŭt năm 2024, ngoai tâm ăp ntŭk ang ngăn bah nkuăl lah hŏ geh dơi nkô̆ nau rkaih luh ach o, rnoh rnăk ach o, êp ach o huch ngăn rnôk knŭng hôm rlau 31%. Nau geh bôk nŭih bah nkuăl geh 36,12 rkeh/nŭih/năm, hao bơi tât bar tŏ rđil năm 2020.

 Tât rnôk aơ, Khánh Sơn hŏ rklaih bah rnoh nkuăl ach o, ơm lơn du năm  rđil nau ntrŭnh Đại hội Đảng bộ nkuăl, lah nau tơm khlay gay leo nkuăl tât nau dơi prêh lơn. Wa Bùi Hoài Nam, Bí thư nkuăl uỷ Khánh Sơn mbơh, tuch tăm lah nau kan tơm, rnôk geh rlau 70% tâm nau văng sa, kŏ lah mpông gay kơl nkuăl jut ach o ngăch tâm ăp năm êp aơ ndrel geh mpŏng lah kơl an ƀon lan jêng rnăk sâm geh, ndrŏng. Lam nkuăl geh 29 nŭih geh ryơk lah nŭih bu rnơm, tâm nê 24 nŭih đảng viên, aơ lah nau nsôih gay nkuăl geh dơi nkô̆ nau prêh lơn tâm rơh tât. Wa Bùi Hoài Nam, nkoch:

‘N’hao nau dơi bah nŭih bu rnơm tâm ƀon lan, khân păng lah nŭih geh âk prăk tă bah nau kan tuch tăm tâm nkuăl Khánh Sơn. Bah nê, lŏ pơk hvi nau kan tuch tăm, n’hao nau mât ntŭk ntu, nŭih ƀon lan ƀư mir, tuch tăm ƀư sâm geh nâp. Êp tât, nkuăl mbơh luh nkô̆ nau geh rnoh rnăk rklaih ach o nâp nâl, rnoh sâm geh tâm ƀon lan rnoi mpôl đê̆”.

Wa Nghiêm Xuân Thành, Bí thư n’gor uỷ Khánh Hoà đă 2 nkuăl Khánh Sơn ndrel Khánh Vĩnh jêh geh kơp dơn rklaih ach o, nsôih mô ân geh plŏ tay ăch o ma ân geh hun hao jêng nkuăl sâm geh đah nau nsôih kan bah nơm. Ŭch kơt nê, ăp nkuăl ân geh năl kloh ăp nau dơi gay ntuh kơl. Nau kan ntuh kơl ân tơm, ƀư kan rjăp, njêng nau nsôih hun hao. Tĭng wa Nghiêm Xuân Thành, ăp nkuăl ân njrăng nau hun hao âk ntil tơm tăm geh rnoh văng sa âk, hun hao nâp nâl ndrel ma nau tăm ndrel mât ntŭk nti gŭ âm:

‘Đảng viên hăn lor, ƀon lan hăn tĭng ba kơi mpeh hun hao tuch tăm leo nsĭt nau săk geh văng sa âk, dŭt rhơn. Ăp đồng chí hŏ ntrŭnh ƀư nau kan, nkoch trêng, bonh đă ƀon lan ndrel ƀư lor. Ăp đồng chí tâm nkuăl hŏ leo trong lăp kan nâp bah ăp đồng chí. Nau ang bah n’gor Khánh Hoà lah huch ach o, hao sâm geh, 2 nkuăl rklaih ach o lor du năm, aơ lah nau nsôih ngăn, têh ngăn. Rklaih ach o lah nau kan geh nau dơi an geh kơp dơn”./.