Nai Kpă Pual an gĭt, lap gay jêng “nuĭh way kan” tâm nău mĭn rvê nău ngơi rplay sam ƀŭt Jarai tâm năm 2008, Ngih sam ƀŭt Đại học Tây Nguyên pơk trong nău kan Ntĭm nti Tiểu học nău ngơi Jarai. Aơ lah nău kan mhe, nsĭt geh nău êng, mô hŏ geh nai. Nai Kpă Pual dơi N’gâng kan ntĭm nti n’gor Gia Lai mbơh ƀư nai ntĭm nti an Ngih sam ƀŭt Đại học Tây Nguyên; nkre ntĭm nti nai an ngih sam ƀŭt, nkre ntĭm nti an sinh viên. Jêh nĕ, wa dơi N’gâng kan ntĭm nti jă râng nchih ndrôm sam ƀŭt giáo khoa nău ngơi rplay sam ƀŭt Jarai bah jrô 1 tât jrô 5. Ndrel đah nĕ, Viện Khoa học Giáo dục (N’gâng kan ntĭm nti) jă râng mĭn njêng, nchih Ndrôm sam ƀŭt ntĭm nti 2 nău ngơi tĭng nău ngơi me deh (nău ngơi rplay sam ƀŭt Jarai), Ndrôm sam ƀŭt rhŏ an Bôk nău kan đăp mpăn uĕh di ntĭm nti ngih sam ƀŭt (SEQAP)...

Săk gâp nơm ri nti mpeh nău kan Toán, yơn ma gâp saơ nău ngơi Jarai gâp hôm e đêt nuĭh mĭn njêng mĭn joi jru, yor nê gâp mĭn joi êng, rgum gay mât ndrăy đah nău ŭch gay trêng ntĭm tay an rơh bah kơi. Gâp saơ văn hóa bah nuĭh Jarai hôm e âk nău uĕh ma đêt nuĭh ŭch mĭn joi gay mât ndrăy. Gâp mpŏng ŭch mô knŭng săk gâp ma ăp nuĭh geh wât mpeh nău ngơi rpaly sam ƀŭt Jarai jêng ndrel mĭn njêng kơp dơn ngoăy gay mô an roh văn hóa way ơm bah rnoi nuĭh nơm.

Deh n’hanh têh bah ƀon lan, têh jêng tâm rnôk nti ren, jêng tâm rnôk ntĭm nti, mĭn njêng, nchih ndrôm sam ƀŭt, nai Kpă Pual lĕ dŏng ndơ tâm nău rêh bah nuĭh Jarai dŭt blău. Lơn lah, ăp nău rŏ, ăp nău mprĭng, nău ot ndrong bah nuĭh Jarai lĕ dơi wa ndơ̆ tâm ndrôm sam ƀŭt giáo khoa, gay rgop mât ndrăy nău uĕh văn hóa bah rnoi nuĭh nơm.

Ăp nău nchih, ăp nău ngơi, nău mprĭng ri mpôl hên nchih tay gay mât ndrăy tay, bah nău ngăn nău rêh bah nuĭh Jarai. Nĕ lah ăp nău ngơi dơi rgum bah nău rêh ntŭk ƀon lan, ăp nău ot ndrong bah kăl e geh nkô̆ nău ntĭm âk. Dơi ăp nău ngơi mpeh gŭ âm ăp nar, mpeh trong mât ndrăy nău way ơm... lĕ rngôch ăp nău nĕ mpôl hên nchih tay gay trêng ntĭm an rơh bah kơi.

Kpă Pual âk năm pah kan tâm nău ntĭm nti đah nkual jêr jŏt Krông Pa, Gia Lai. Bôk năp knŭng râng tâm năm nti sơ cấp sư phạm 1 năm lĕ luh hăn ntĭm, jêh dơi hăn nti Trung cấp sư phạm ta Kon Tum. Jêh rnôk tốt nghiệp, plơ̆ sĭt ntĭm ta ƀon geh 3 năm, nai Kpă Pual dăn hăn nti tay Đại học nkre nti nkre pah kan Quy Nhơn. Tâm rnôk pah kan, wa geh rlău 10 năm ƀư Hiệu trưởng, jêh nĕ ƀư Groi kruanh jrô kan ntĭm nti nkuăl Krông Pa, jêh nĕ lŏ dơi đă hao N’gâng kan ntĭm nti n’gor Gia Lai, mât ƀư Kruanh Ban Giáo dục Dân tộc. Yơn bah kơi nĕ, Nai Kpă Pual dăn plơ̆ sĭt ƀon lan ƀư nai tât aƀaơ rlu ranh.

“Rlu ranh yơn mô rlu nău kan”, aƀaơ sĭt đah ƀon lan, yơn nai Kpă Pual hôm e dŭt n’hâm mĭn njêng, râng mpôl uănh năl ndrôm sam ƀŭt giáo khoa nău ngơi Jarai bah N’gâng kan ntĭm nti, nkre râng ntĭm nti ăp năm ntĭm nti nău ngơi Jarai an cán bộ ta ntŭk:

Nău mât ndray nău ngơi rplay sam ƀŭt Jarai dŭt khlay, tâm ăp nău ngơi gay lah mpeh nău way ơm mô lah ăp nău ntĭnh geh nău ntĭm nti kon sau ri an dŏng đah nău ngơi Jarai ri mư trêng ntĭm geh nkô̆ nău jru. Tâm rnôk mĭn joi ri mpôl hên lĕ dŏng bar nău ngơi, geh rnôk tâm nău Yuăn ri mô dơi rblang tŏng ăp nkô̆ nău bah pơng, jêng an nâm ơm nău ngơi Jarai ri mư dơi rblang lĕ nkô̆ nău bah nuĭh kăl e ŭch njuăl ntĭm nti.

Dŭt n’hâm đah rplay sam ƀŭt, nai Kpă Pual lah nuĭh leo lor đah nuih n’hâm ŭch rŏng trêng ntĭm nău ngơi rplay sam ƀŭt Jarai an rơh kơn bah kơi.