Ntoh nau tâm nar rđau kan, Kruanh Quốc hội Trần Thanh Mẫn mbơh, năm 2024, bol ma neh dak hôm âk nau jêr, yơn lah hun hao GDP hôm geh 7%, ăp lĕ 15 nkô̆ nau yor Quốc hội ndŏ luh, rêh jêng geh đăp mpăn. Chính phủ, Trung ương Mặt trận Tổ quốc Việt Nam dôl nsôih ƀư nau jut ngih truh sat, nau kan neh dak, rnă njrăng geh mât nâp, nau kan tâm nchră đah ba dih geh ƀư n’hao; nau kan njrăng rdâng sa khâm, mpŭng lir geh ntrŭt dăng, nau rnơm bah ƀon lan đah Đảng, Ngih dak geh n’hao prêh.

            Kruanh Quốc hội lah rjăp, geh dơi nau aơ lah rnơm nau nsôih bah lam Đảng, lam tahen ndrel ƀon lan, tâm nê geh nau rgop têh bah Quốc hội tâm nau ndâk pháp luật, ntrŭnh ăp nau kan khlay bah neh dak tĭng nau rgâl nau mĭn ndrel nau ƀư luật. Ntoh măt Uỷ ban Rnâng kan Quốc hội, Kruanh Quốc hội Trần Thanh Mẫn rnê ăp nau rgop bah ăp Uỷ ban, ăp ntŭk kan tâm jrâu kan Quốc hội. Lah rjăp, tâm năm 2025 geh âk nau khlay bah neh dak, Kruanh Quốc hội đă ăp ntŭk kan bah Quốc hội, Văn phòng Quốc hội, ăp ntŭk kan tâm Uỷ ban Rnâng kan bah Quốc hội ân nsôih lơn tay gay rklaih nau ê dơi, hôm nkol:

            ‘Tât aơ tă, phung hên ân mhâm ƀư klaih ân dơi tâm rơh rƀŭn tal 9, rơh rƀŭn tal 10 mô lah bah năp măt lah bah năp măt lah rơh rƀŭn ndal tâm khay 2 năm 2025 lah nau kan nâp bah ăp nau ntrŭnh, nau mbơh, nau nâp mêt uănh. Tal bar lah njoăl săm ƀŭt tât ntoh măt Quốc hội mhâm ƀư ân ăn. Tal pe lah nau nâp bah nau tâm nchră bah ăp Hội đồng dân tộc, ăp uỷ ban ăp rmôt kan, Văn phòng Quốc hội ân ueh lơn. Nau tal puăn lah nau ƀư nâp nau kan tâm ntŭk kan bah nơm lah ân geh ƀư ân rjăp lơn. Mhâm ƀư gay nau dơi, nau rnơm bah Quốc hội ân geh n’hao prêh tâm nau rêh, tâm ƀon lan. Nau khlay lah nau rnơm bah Quốc hội, Quốc hội ân geh kơl an ƀon lan. Aơ lah ăp nau kan ma nơm ân mĭn tâm nau kan, tâm rklaih nau kan”.

            Ngăn lah nau ƀư nau ntrŭnh mrô 18 bah Trung ương mpeh nau dăp rgum ntrong kan ân geh ƀư ân rjăp. Di rnôk aơ, Kruanh Quốc jội ŭch, ăp cán bộ, công chức, viên chức, nŭih pah kan nsum n’hâm, tâm ban nau, tâm rnglăp gay rlet nau jêr. Kruanh Quốc hội đă, ăp ntŭk kan bah Quốc hội, ăp ntŭk kan tâm Uỷ ban Rnâng kan Quốc hội lŏ rgâl nau mĭn ƀư luật, ntrŭt dăng nau mêt uănh, pă gưl, pă kan rjăp gay rklaih nâp nau dơi, nau kan, nŭih ƀư, nkre mêt uănh ndrel rgâl hành chính tâm Quốc hội.

Kruanh Quốc hội kŏ nkah, rơh tât aơ, ăp mrôt kan bah Văn phòng Quốc hội ân nchrăp ăp nau kan, kơt: Nau kan rƀŭn lôch năm bah Quốc hội, săch 10 nau kan khlay tâm năm 2024; nau kan mât chăm Tết ân cán bộ, công chức, rnăk vâl jêr jŏt. Ngăn lah, Uỷ ban Rnâng kan ƀư ăp rơh rƀŭn tal 41, 41 tâm khay 1, 2 năm 2025 ndrel rơh rƀŭn ndal tâm khay 2 năm 2025; nchrăp ân rơh rƀŭn tal 9, Quốc hội gưl 15; ƀư dơi tâm nchră Quốc hội mpeh nau kan mêt uănh ndrel pă nkhôm Hồng Diên tal 3, đăp mpăn sakư tam, ueh, njêng nau dơi rêng.

            Bah năp nê, tĭng Tổng thư ký Quốc hội, Kruanh Văn phòng Quốc hội Lê Quang Tùng, nau ntrŭnh ƀư mrô 18 bah Rnâng kan rđay kan Quốc hội hĭ rđau, đă Uỷ ban Rnâng kan Quốc hội ndâk Rnâng kan rđau nau kan lôch rơh rƀŭn tal 18 tâm Quốc hội yor Kruanh Quốc hội ƀư tơm Kruanh Rnâng kan rđau kan, ăp Groi Kruanh Quốc hội lah Groi Rnâng kan rđau đă. Kruanh Quốc hội hŏ ƀư rjăp mpeh nau rgâl mhe, dăp rgum gleh ntŭk kan n’hao nau nâp, nau tam tâm nau kan bah ăp ntŭk kan bah Quốc hội, ăp ntŭk kan tâm Uỷ ban Rnâng kan Quốc hội, Văn phòng Quốc hội, geh nau mbơh khlay tâm rơh rƀŭn tâm lam dak ntrŭnh, ƀư lôch nau Ntrŭnh mrô 18 mpeh nkô̆ nau “Ntrong rkaih ăp nau kol, nau nâp mpeh nau kan”./.