Tâm rnôk bri n’ik bah dŭt năm, Trung tá Lâm Mạnh Tuyển cán bộ Đồn Biên phòng Ia Chía, nkuăl Ia Grai, n’gor Gia Lai tât khâl wa Puih Yơng, bơi 80 năm rêh drâu tâm ƀon Beng, xã Ia Chía. Âk năm ma aơ, n’hâm soan mô dăng, wa Yơn hăn ro ndrel âk năm ma aơ, Trung tá Tuyển ndrel tahen hŏ tât tâm ngih khám săm ân wa. Rnôk ndơn dak si bah ty tahen, wa Puih Yơng mbơh:

‘Gâp dŭt n’hâm lah ueh ngăn rnok ma ƀa ƀơ geh ăp kônh tahen biên phòng tât kơl an, khám săm ji ân hên. Săk gâp aơ lah rnăk vâl jêr jŏt, rêng êng du hê, yor sai ndrel kon gâp khĭt lĕ khĭt jêh, âk rnôk ji kuet mô geh prăk hăn khám ji, nar aơ ăp nô lŏ tât khám ndrel pă dak si gay ma săm ji ân ma gâp đŏng”.

 Kŏ lah nŭih bu ranh mâp nau mô ueh mpeh n’hâm soan, wa Ksor Bơng, 74 năm tâm ƀon Bi, xã Ia O, mbơh, tahen Biên phòng Ia O, mro lah ntŭk ma kônh wa mĭn tât bôk năp rnôk ji kuet. Rnơm geh nau kơl an bah tahen biên phòng, rnôk aơ kônh wa mô hôm lăng rvê tât nau ji, tât nau hăn ngai, roh hoach:

‘Kơl an ƀon lan âk ngăn, tahen ndâk du ntŭk ngih dak si tâm ƀon ro, rnôk ji kuet ri kônh wa tât bĭch săm, ngêt dak si tahen ân da dê. Kônh wa hăn tât gay ma dăn dak ri rnôk ji kuet, ji ndul ri tahen kơl an dĭng lĕ. Hôm lah ji jâk ir ri ntrơn hăn ngih dak si ba lơ”.

Âk năm ma aơ, tahen biên phòng ƀư nau kan mât chăm n’hâm soan ân tahen, khám săm ân kônh wa tâm nkual n’har bri ndrel nŭih ƀon lan dak băl Campuchia. Êp nau khám, săm nau ji, ăp nai dak si hôm mbơh ân ƀon lan nau njrăng, rdâng ăp nau ji vay mâp; ƀư nau rêh kloh, khoa học, ngêt duh sa sĭn, bĭch kât mŭng...Bah nê, rgop nau ndrel ma ngih dak si tâm dâng n’hao nau gĭt bah ƀon lan mpeh nau kan dak si, njrăng rdâng srê ji, răk kloh ntŭk ntu bah ƀon lan mpeh nau kan dak si ndrel geh dŏng nau khám săm ji. Trung tá Trần Anh Tuấn, Quân y tahen Biên phòng Ia O, nkuăl Ia Grai, mbơh:

 ‘Bok nau kan khám săm ji bah tahen tâm rgop nsum, lah geh nau kơl an mô geh roh prăk, ăp khay, tâm 3 khay ri hăn tât ta ƀon gay ma pă ndrel khám săm nau ji ân kônh wa, tă bah nê njêng nau nthoi đah ntŭk kan tahen ndrel ƀon lan, njêng nau rnơm bah kônh wa ndrel tahen biên phòng. Nơm kŏ tâm rgop ma ngih dak si xã mô lah công ty 75 ma geh nau kan khám, pă dak si mô roh prăk ân kônh wa ri hên tâm rgop ndrel râng gay ma khám săm ji ân kônh wa”.

Ntơm năm 2003 tât rnôk aơ, ndrel nau khám săm ji tâm ngih dak si, tahen Biên phòng tâm Gia Lai hŏ ƀư âk tŏ hăn tât thôn, ƀon pă dak si mô roh prăk ân bơi tât 2000 nŭih ndrel pă nklăp 600 rkeh prăk ân ăp rnăk jêr jŏt nkuăl n’har bri. Wa Ksor Tuông, Groi Kruanh UBND xã Ia O, nkuăl Ia Grai mbơh ăp nau kan bah tahen Biên phòng rgop nau n’hao nau mât ntŭk ntu, njrăng rdâng ăp nau ji:

‘Rmôt tahen bah biên phòng nsôih ngăn tâm nau kan nkoch trêng ân kônh wa rnăk kloh ntŭk ntu gŭ âm. Tât aơ rnăk ƀon lan khâl, khám săm ân bu ranh, kon se. Bah nau năl ri nau mât chăm răk êng n’hâm soan ndrel ntŭk ntu bah kônh wa geh ƀư ueh, rnoh ji rnoh trong mham huch, ăp nau ji êng geh nkân njrăng mô ân rêng jêng srê tâm nkuăl. Nê lah du gưl rnơm nau kơl an mât chăm n’hâm soan bah kônh wa ƀon lan bah ăp nŭih cán bộ tahen tâm nkuăl”.

 Ăp nau kan khlay, ngăn bah ăp rmôt nai dak si tahen Biên phòng n’gor Gia Lai hŏ ndrel ma ăp gưl uỷ, n’gâng kan, ngih dak si tâm dâng ƀư ueh nau kan mât chăm n’hâm soan ân ƀon lan. Rgop nau ƀư nâp nau tâm rnglăp tahen, ƀon lan ntŭk nkuăl n’har bri, mât nâp nkuăl neh bah neh dak./.