Bôk nau kan “Nam mhe nkuăl n’har bri-Duh ndăm nuih n’hâm ƀon lan” năm Ất Tỵ 2025 mhe geh N’gâng kan rđau tahne Biên phòng n’gor Gia Lai ƀư tâm xã Ia Pnôn, nkuăl Đức Cơ, đah âk nau kan khlay, kơt “Tăch ndơ Tết mô geh roh prăk”, nau kan nklâm bánh chưng ndrel tâm n’ur njroh mprơ rhơn neh dak rgâl mhe, rhơn Đảng, năm mhe Ất Tỵ 2025. Ta aơ, N’gâng kan rđau tahen Biên phòng Gia Lai pă 100 nklâm ndơ ân ăp rnăk dơi kơl ndrel rnăk geh nau rehe jêr jŏt. Nkre, 20 kon se tâm bôk nau kan “N’hao nhoat jâng oh hăn nti” ndrel kon rong bah ăp đồn Biên phòng geh ndơn ndơ tết. Geh pă ndơ, nô Siu Kỳ, tâm ƀon Bua, xã Ia Pnôn, nkuăl Đức Cơ, nkoch:

 ‘Săk gâp rhơn ngăn, tâm năm mhe, N’gâng kan rđau tahen Biên phòng n’gor Gia Lai hŏ tât xã pă ndơ, khám n’hâm soan ân kônh wa, kônh wa tâm xã ndrel 4 thôn ƀon lah ueh nau kơl an bah N’gâng kan rđau tahen Biên phòng ndrel ăp rmôt ndrel ƀư”.

Ia Pnôn lah xã n’har bri bah nkuăl Đức Cơ, n’gor Gia Lai đah âk rnoi mpôl đê̆, nau rêh hôm jêr. Rnoh rnăk ach o hôm 16,49%. Đah nau nchôih mo ân geh nŭih nchlơi êng ba kơi ndrel đăp mpăn ăp rnăk geh sa tết, bôk nau kan hŏ ntrŭnh ƀư âk nau ueh.

Tâm Dak Lak, Bôk nau kan “Năm mhe nkuăl n’har bri duh răm nuih n’hâm ƀon lan” kŏ geh N’gâng kan rđau tahen Biên phòng n’gor ƀư tâm xã Ia Lốp, nkuăl Ia Súp. Nsum nau rhơn, ăp nau njroh Khua Luống bah kônh wa rnoi Thái ndrel nau răch ân mih lăng prăng ueh. Yuh Hà Thị Tằm, nŭih ƀon lan ta thôn Nừng Nhạt, xã Ia Lốp, mbơh: nau pâl aơ mô knŭng lah nau ueh ơm, nuih n’hâm n’hâm tâm rngăp ndrel lah gay kônh wa dơi geh ntoh nau blau, nuih n’hâm tâm rnglăp đŏng:

‘Gâp geh nti tă bah kon se, tĭng u che, gâp ntĭm êng ân rơh mom mô ân khân păng chuêl nau vay ơm bah rnoi mpôl nơm. Khua Luống geh nau khlay ŭch ân mih lăng prăng ueh, pah kan jan sa geh jêng”.

Ndrel ƀư ăp nau kan văn hoá, ăp tahen Biên phòng hôm tâm rgop nsum ma ăp nŭih nai dak si bah Ngih dak si Đại học Y dược nkuăl ƀon têh Buôn Ma Thuột khám săm ji ndrel pă dak si ân kônh wa. Yuh Cầm Thị Sáu, ta thôn Đóng, rhơn nkoch:

‘Lah ueh tahen Biên phòng hŏ ƀư nar rgum aơ gay kônh wa ƀon lan geh hăn khám n’hâm soan, geh nklâm bánh chưng, geh râng nau tâm n’ur njroh mprơ”.

Wa Lăng Thị Nguyên, Groi Kruanh UBND xã Ia Lốp, nkuăl Ea Súp mbơh, xã geh rlau 1.800 rnăk, đah 15 rnoi mpôl oh nô ndrel rêh, rnoh rnăk ach o rlau 54%. Bôk nau kan “Năm mhe nkuăl n’har bri duh răm nuih n’hâm ƀon lan” hŏ leo tât ân ƀon lan ta aơ du năm mhe duh răm:

‘Bôk nau kan năm mhe tahen Biên phòng duh răm nuih n’hâm ƀon lan đah du xã n’har bri geh nau kan aơ lah nau rhơn, yeh ndrel nau bonh đă têh ngăn đah kônh wa xã Ia Lôp. Hŏ leo tât du năm mhe hơm răm ân kônh wa tâm rnôk tết Ất Tỵ”.

Tâm bôk nau kan, bơi tât 400 nklâm ndơ geh pă ân rnăk dơi kơl ndrel rnăk ach o, ndrel du ngih tâm kơl, rnoh 100 rkeh prăk. Ngăn lah, ăp nklâm prăk pă ân kon se nti blau, kơl an kon se geh tay nau gơih nâp. Đại tá Rơ Lan Ngân, Groi Chính uỷ, N’gâng kan rđau tahen n’gor Dak Lak, mbơh:

‘Di rnôk năm mhe Ất Tỵ năm 2025, tahen Biên phòng n’gor ƀư bonh đă ăp ntŭk geh nuih n’hâm lŏng ƀư âk nau kan, tâm nê geh Bôk nau kan phung hên ntrŭnh kơt lah, kon rong đồn biên phòng, kơl nhoat jâng oh hăn nri, yăng phe kơl an, ngih kơl an, kơl an kônh wa geh nau dơi sa tết ueh lơn. Phung hên kŏ ŭch nau rŏng bah ƀon lan tâm nkuăl n’har bri ntop tay ƀư rjăp đah tahen Biên phòng ndrel ma tahen Biên phòng ƀư ueh lơn nau mât nau ƀư tơm đăp mpăn n’har bri”.

Bôk nau kan “Năm mhe nkuăl n’har bri duh răm nuih n’hâm ƀon lan” geh ƀư tâm 2 nkuăl n’har bri Gia Lai ndrel Dak Lak mô êng lah nklâm ndơ khlay, ma hôm lah nau tâm rgop rjăp tâm kơl đah tahen, ƀon lan ƀư rjăp lơn đah rmôt tahen ndrel kônh wa ăp rnoi, njêng nau nâp ân du nkuăl n’har bri ueh lăng, hơm răm./.