Tâm ăp nar rlău aơ, mpôl tahen kan nsum  đah n’gâng kan ta ntŭk n’hanh n’gâng kan dơi kan ƀư âk nău kan mât chăm Tết an nuĭh ach o ta n’gor Dak Lak. Ta xã Ea Tiêu, nkuâl Cư Kuin, Bộ Công an kan nsum đah Công an n’gor n’hanh mpôl druh ndăm ƀư bôk nău kan “Sĭt đah ƀon lan". Nkhêp geh rnôk dja, kruanh rđău kan Bộ Công an hŏ ndơ̆ kơl 300 nklâm ndơ Tết an ăp rnăk nuĭh geh n’hâm suan, bu ranh ƀon, kruanh buôn, nuĭh geh nău rêh jêr jŏt; druh ndăm Công an Ƀon lan.

 Mpôl druh ndăm Dak  Lak kơl an du jrô máy tính, 100 nklâm học bổng tiếng Anh tât ăp kon se nti tiểu học, rdâk ƀư n’gâng ŭnh mpoh ang ƀon lan, trong cờ Tổ quốc; Bộ Tư lệnh Cảnh sát Cơ động sa nkra n’hanh kơl an 2 mblâm jay tâm rŏng. Bôk nău kan “Sĭt ƀon lan” bah Bộ Công an gay ntĭm nti nău way ơm rŏng dak, ring lam nkô̆ hôr uĕh lăng bah nău way di “Ngêt dak kah gĭt tu tơm", nuih n’hâm nkah gĭt đah nuĭh geh n’hâm suan cách mạng, rdâk tay nuih n’hâm tâm rnglăp krêp dêh jĭr mpêt tâm ƀon lan ăp rnoi nuĭh Việt Nam.

Tâm xã n’har bri Ia Lốp, nkuăl Ea Súp, n’gor Dak Lak geh Bôk nau kan “Năm mhe nkual n’har bri răm nuih n’hâm ƀon lan”, leo tât ân kônh wa ăp rnoi mpôl đê̆ ta aơ du năm mhe duh răm ndrel geh âk nau ŭch. Tâm bôk nau kan, bơi tât 400 nklâm ndơ geh pă tât ăp rnăk dơi kơl ndrel rnăk ach o, ndrel du ngih kơl an rnoh 100 rkeh. Ngăn lah, ăp nklâm prăk kŏ geh pă ân kon se nti blau, kơl an kon se lăp tâm nau dơi. Bôk nau kan “Năm mhe nkual n’har bri răm nuih n’hâm ƀon lan” mô êng lah nklâm ndơ ma hôm lah nau tâm nthoi bah tahen ƀon lan, ƀư rjăp nau tâm boh đah rmôt n’har bri ndrel kônh wa ăp rnoi, njêng nau nâp ân nkuăl n’har bri đăp mpăn, hơm răm.