Ta xã Ia Pnôn, nkuăl Đức Cơ, n’gâng kan leo kan tahen n’har bri n’gor Gia Lai lĕ geh ƀư bôk nău kan “năm mhe n’har bri- răm nuih n’hâm ƀon lan” năm mhe Ất Tỵ 2025. Ia Pnôn lah xã n’har bri, đah âk nuĭh ƀon lan lah ƀon lan rnoi đê̆, nău rêh hôm nha geh âk nău jêr jŏt, rnoh rnăk ach o bâh xã hôm 16,49%. Đah trong kan mô an geh du hê nuĭh nklơi tay ba kơi n’hanh mât đăp mpăn ăp rnăk ƀon lan geh Tết da dê, bôk nău kan lĕ mbơh tơih âk nău kan na nê̆ kơt: Rơh tăch mô sŏk prăk”, nău pah kan nklâm banh chưng nđir n’hanh tâm nđur văn hóa njroh mprơ. Di rơh aơ, n’gâng kan leo kan tahen n’har bri n’gor Gia Lai lĕ pă an 100 nklâm ndơ an ăp rnăk vâl dơi kơl n’hanh rnăk geh nău rêh jêr jŏt, 20 kon hoc lah kon rong bâh tahen n’har bri lĕ geh dơn ndơ Tết đŏng.

Trung ương Rmôt Nai dak si Mom Việt Nam mhe tâm rgop đah N’gâng kan dak si n’gor Dak Lak ƀư Bôk nău kan “Xuân tình nguyện-Tết nhân ái” ta xă Chư Kpô, nkuăl Krông Búk, Bôk nău kan lĕ an 20 nklâm ndơ an kon hŏk n’hanh ăp rnăk wâl geh nău rêh jêr jŏt,, ntop kơl 10 nuĭh rek play nuih an dơm an kon se n’hanh 50 nuĭh rek phaco an nuĭh ƀon lan ji mpeh măt ta nkuăl Krông Búk. But uănh ji, pă dak si an dơm an 500 nuĭh ƀon lan ta lam xă Cư Kpô. Rơh aơ, mpôl rdâk ƀư tât khâl, an ndơ 5 rnăk dơi kơl geh soan đah cách mạng ta lam xă Cư Kpô, nkuăl Krông Búk. Dĭng lĕ prăk ăp nău ƀư lah 1,3 rmen prăk. Bôk nău ƀư geh nkô̆, ngăn ngêt ntop kơl, mât uănh Tết Nguyên đán hơm răm, nsĭt tay săk soan, nău răm an ăp oh kon se, nuĭh ƀon lan ta ăp ntŭk nkual jêr jŏt bah n’gor Dak Lak